6. உபஜ்ஜா²யஸுத்தம்

56. அத² கோ² அஞ்ஞதரோ பி⁴க்கு² யேன ஸகோ உபஜ்ஜா²யோ தேனுபஸங்கமி; உபஸங்கமித்வா ஸகம் உபஜ்ஜா²யம் ஏதத³வோச – ‘‘ஏதரஹி மே, ப⁴ந்தே, மது⁴ரகஜாதோ சேவ காயோ, தி³ஸா ச மே ந பக்கா²யந்தி, த⁴ம்மா ச மம் நப்படிப⁴ந்தி, தி²னமித்³த⁴ஞ்ச மே சித்தம் பரியாதா³ய திட்ட²தி, அனபி⁴ரதோ ச ப்³ரஹ்மசரியம் சராமி, அத்தி² ச மே த⁴ம்மேஸு விசிகிச்சா²’’தி.

அத² கோ² ஸோ பி⁴க்கு² தம் ஸத்³தி⁴விஹாரிகம் பி⁴க்கு²ம் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘அயம், ப⁴ந்தே, பி⁴க்கு² ஏவமாஹ – ‘ஏதரஹி மே, ப⁴ந்தே, மது⁴ரகஜாதோ சேவ காயோ, தி³ஸா ச மம் ந பக்கா²யந்தி, த⁴ம்மா ச மே நப்படிப⁴ந்தி, தி²னமித்³த⁴ஞ்ச மே சித்தம் பரியாதா³ய திட்ட²தி, அனபி⁴ரதோ ச ப்³ரஹ்மசரியம் சராமி, அத்தி² ச மே த⁴ம்மேஸு விசிகிச்சா²’’’தி.

‘‘ஏவஞ்ஹேதம், பி⁴க்கு², ஹோதி இந்த்³ரியேஸு அகு³த்தத்³வாரஸ்ஸ, போ⁴ஜனே அமத்தஞ்ஞுனோ, ஜாக³ரியம் அனனுயுத்தஸ்ஸ, அவிபஸ்ஸகஸ்ஸ குஸலானம் த⁴ம்மானம், புப்³ப³ரத்தாபரரத்தம் போ³தி⁴பக்கி²யானம் த⁴ம்மானம் பா⁴வனானுயோக³ம் அனனுயுத்தஸ்ஸ விஹரதோ, யம் மது⁴ரகஜாதோ சேவ காயோ ஹோதி, தி³ஸா சஸ்ஸ ந பக்கா²யந்தி, த⁴ம்மா ச தம் நப்படிப⁴ந்தி, தி²னமித்³த⁴ஞ்சஸ்ஸ சித்தம் பரியாதா³ய திட்ட²தி, அனபி⁴ரதோ ச ப்³ரஹ்மசரியம் சரதி, ஹோதி சஸ்ஸ த⁴ம்மேஸு விசிகிச்சா². தஸ்மாதிஹ தே, பி⁴க்கு², ஏவம் ஸிக்கி²தப்³ப³ம் – ‘இந்த்³ரியேஸு கு³த்தத்³வாரோ ப⁴விஸ்ஸாமி, போ⁴ஜனே மத்தஞ்ஞூ, ஜாக³ரியம் அனுயுத்தோ, விபஸ்ஸகோ குஸலானம் த⁴ம்மானம், புப்³ப³ரத்தாபரரத்தம் போ³தி⁴பக்கி²யானம் த⁴ம்மானம் பா⁴வனானுயோக³ம் அனுயுத்தோ விஹரிஸ்ஸாமீ’தி. ஏவஞ்ஹி தே, பி⁴க்கு², ஸிக்கி²தப்³ப³’’ந்தி.

அத² கோ² ஸோ பி⁴க்கு² ப⁴க³வதா இமினா ஓவாதே³ன ஓவதி³தோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ஸோ பி⁴க்கு² ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி, தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ பன ஸோ பி⁴க்கு² அரஹதம் அஹோஸி.

அத² கோ² ஸோ பி⁴க்கு² அரஹத்தம் பத்தோ யேன ஸகோ உபஜ்ஜா²யோ தேனுபஸங்கமி; உபஸங்கமித்வா ஸகம் உபஜ்ஜா²யம் ஏதத³வோச – ‘‘ஏதரஹி மே, ப⁴ந்தே, ந சேவ [ந த்வேவ (ஸீ.)] மது⁴ரகஜாதோ காயோ, தி³ஸா ச மே பக்கா²யந்தி, த⁴ம்மா ச மம் படிப⁴ந்தி, தி²னமித்³த⁴ஞ்ச மே சித்தம் ந பரியாதா³ய திட்ட²தி, அபி⁴ரதோ ச ப்³ரஹ்மசரியம் சராமி, நத்தி² ச மே த⁴ம்மேஸு விசிகிச்சா²’’தி. அத² கோ² ஸோ பி⁴க்கு² தம் ஸத்³தி⁴விஹாரிகம் பி⁴க்கு²ம் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘அயம், ப⁴ந்தே, பி⁴க்கு² ஏவமாஹ – ‘ஏதரஹி மே, ப⁴ந்தே, ந சேவ மது⁴ரகஜாதோ காயோ, தி³ஸா ச மே பக்கா²யந்தி, த⁴ம்மா ச மம் படிப⁴ந்தி, தி²னமித்³த⁴ஞ்ச மே சித்தம் ந பரியாதா³ய திட்ட²தி, அபி⁴ரதோ ச ப்³ரஹ்மசரியம் சராமி, நத்தி² ச மே த⁴ம்மேஸு விசிகிச்சா²’’’தி.

‘‘ஏவஞ்ஹேதம், பி⁴க்கு², ஹோதி இந்த்³ரியேஸு கு³த்தத்³வாரஸ்ஸ, போ⁴ஜனே மத்தஞ்ஞுனோ, ஜாக³ரியம் அனுயுத்தஸ்ஸ, விபஸ்ஸகஸ்ஸ குஸலானம் த⁴ம்மானம், புப்³ப³ரத்தாபரரத்தம் போ³தி⁴பக்கி²யானம் த⁴ம்மானம் பா⁴வனானுயோக³ம் அனுயுத்தஸ்ஸ விஹரதோ, யம் ந சேவ மது⁴ரகஜாதோ காயோ ஹோதி, தி³ஸா சஸ்ஸ பக்கா²யந்தி, த⁴ம்மா ச தம் படிப⁴ந்தி, தி²னமித்³த⁴ஞ்சஸ்ஸ சித்தம் ந பரியாதா³ய திட்ட²தி, அபி⁴ரதோ ச ப்³ரஹ்மசரியம் சரதி, ந சஸ்ஸ ஹோதி த⁴ம்மேஸு விசிகிச்சா². தஸ்மாதிஹ வோ, பி⁴க்க²வே, ஏவம் ஸிக்கி²தப்³ப³ம் – ‘இந்த்³ரியேஸு கு³த்தத்³வாரா ப⁴விஸ்ஸாம, போ⁴ஜனே மத்தஞ்ஞுனோ, ஜாக³ரியம் அனுயுத்தா, விபஸ்ஸகா குஸலானம் த⁴ம்மானம், புப்³ப³ரத்தாபரரத்தம் போ³தி⁴பக்கி²யானம் த⁴ம்மானம் பா⁴வனானுயோக³ம் அனுயுத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ச²ட்ட²ம்.