2. விப⁴த்திஸுத்தம்

172. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸும். ஆயஸ்மா ஸாரிபுத்தோ ஏதத³வோச –

‘‘அத்³த⁴மாஸூபஸம்பன்னேன மே, ஆவுஸோ, அத்த²படிஸம்பி⁴தா³ ஸச்சி²கதா ஓதி⁴ஸோ ப்³யஞ்ஜனஸோ. தமஹம் அனேகபரியாயேன ஆசிக்கா²மி தே³ஸேமி பஞ்ஞாபேமி பட்ட²பேமி விவராமி விப⁴ஜாமி உத்தானீகரோமி. யஸ்ஸ கோ² பனஸ்ஸ கங்கா² வா விமதி வா, ஸோ மம் பஞ்ஹேன. அஹம் வேய்யாகரணேன ஸம்முகீ²பூ⁴தோ நோ ஸத்தா² யோ நோ த⁴ம்மானம் ஸுகுஸலோ.

‘‘அத்³த⁴மாஸூபஸம்பன்னேன மே, ஆவுஸோ, த⁴ம்மபடிஸம்பி⁴தா³ ஸச்சி²கதா ஓதி⁴ஸோ ப்³யஞ்ஜனஸோ. தமஹம் அனேகபரியாயேன ஆசிக்கா²மி தே³ஸேமி பஞ்ஞாபேமி பட்ட²பேமி விவராமி விப⁴ஜாமி உத்தானீகரோமி. யஸ்ஸ கோ² பனஸ்ஸ கங்கா² வா விமதி வா, ஸோ மம் பஞ்ஹேன. அஹம் வேய்யாகரணேன ஸம்முகீ²பூ⁴தோ நோ ஸத்தா² யோ நோ த⁴ம்மானம் ஸுகுஸலோ.

‘‘அத்³த⁴மாஸூபஸம்பன்னேன மே, ஆவுஸோ, நிருத்திபடிஸம்பி⁴தா³ ஸச்சி²கதா ஓதி⁴ஸோ ப்³யஞ்ஜனஸோ. தமஹம் அனேகபரியாயேன ஆசிக்கா²மி தே³ஸேமி பஞ்ஞாபேமி பட்ட²பேமி விவராமி விப⁴ஜாமி உத்தானீகரோமி. யஸ்ஸ கோ² பனஸ்ஸ கங்கா² வா விமதி வா, ஸோ மம் பஞ்ஹேன. அஹம் வேய்யாகரணேன ஸம்முகீ²பூ⁴தோ நோ ஸத்தா² யோ நோ த⁴ம்மானம் ஸுகுஸலோ.

‘‘அத்³த⁴மாஸூபஸம்பன்னேன மே, ஆவுஸோ, படிபா⁴னபடிஸம்பி⁴தா³ ஸச்சி²கதா ஓதி⁴ஸோ ப்³யஞ்ஜனஸோ. தமஹம் அனேகபரியாயேன ஆசிக்கா²மி தே³ஸேமி பஞ்ஞாபேமி பட்ட²பேமி விவராமி விப⁴ஜாமி உத்தானீகரோமி. யஸ்ஸ கோ² பனஸ்ஸ கங்கா² வா விமதி வா, ஸோ மம் பஞ்ஹேன. அஹம் வேய்யாகரணேன ஸம்முகீ²பூ⁴தோ நோ ஸத்தா² யோ நோ த⁴ம்மானம் ஸுகுஸலோ’’தி. து³தியம்.