3. மஹாகோட்டி²கஸுத்தம்

173. அத² கோ² ஆயஸ்மா மஹாகோட்டி²கோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாகோட்டி²கோ ஆயஸ்மந்தம் ஸாரிபுத்தம் ஏதத³வோச –

‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்த²ஞ்ஞம் கிஞ்சீ’’தி?

‘‘மா ஹேவம், ஆவுஸோ’’.

‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நத்த²ஞ்ஞம் கிஞ்சீ’’தி?

‘‘மா ஹேவம், ஆவுஸோ’’.

‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்தி² ச நத்தி² ச அஞ்ஞம் கிஞ்சீ’’தி?

‘‘மா ஹேவம், ஆவுஸோ’’.

‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நேவத்தி² நோ நத்த²ஞ்ஞம் கிஞ்சீ’’தி?

‘‘மா ஹேவம், ஆவுஸோ’’.

‘‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்த²ஞ்ஞம் கிஞ்சீ’தி, இதி புட்டோ² ஸமானோ ‘மா ஹேவம், ஆவுஸோ’தி வதே³ஸி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நத்த²ஞ்ஞம் கிஞ்சீ’தி, இதி புட்டோ² ஸமானோ – ‘மா ஹேவம், ஆவுஸோ’தி வதே³ஸி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்தி² ச நத்தி² ச அஞ்ஞம் கிஞ்சீ’தி, இதி புட்டோ² ஸமானோ – ‘மா ஹேவம், ஆவுஸோ’தி வதே³ஸி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நேவத்தி² நோ நத்த²ஞ்ஞம் கிஞ்சீ’தி, இதி புட்டோ² ஸமானோ – ‘மா ஹேவம், ஆவுஸோ’தி வதே³ஸி. யதா² கத²ம் பன, ஆவுஸோ, இமஸ்ஸ பா⁴ஸிதஸ்ஸ அத்தோ² த³ட்ட²ப்³போ³’’தி?

‘‘‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்த²ஞ்ஞம் கிஞ்சீ’தி, இதி வத³ம் அப்பபஞ்சம் பபஞ்சேதி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நத்த²ஞ்ஞம் கிஞ்சீ’தி, இதி வத³ம் அப்பபஞ்சம் பபஞ்சேதி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ அத்தி² ச நத்தி² ச அஞ்ஞம் கிஞ்சீ’தி, இதி வத³ம் அப்பபஞ்சம் பபஞ்சேதி. ‘ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ நேவத்தி² நோ நத்த²ஞ்ஞம் கிஞ்சீ’தி, இதி வத³ம் அப்பபஞ்சம் பபஞ்சேதி. யாவதா, ஆவுஸோ, ச²ன்னம் ப²ஸ்ஸாயதனானம் க³தி தாவதா பபஞ்சஸ்ஸ க³தி; யாவதா பபஞ்சஸ்ஸ க³தி தாவதா ச²ன்னம் ப²ஸ்ஸாயதனானம் க³தி. ச²ன்னம், ஆவுஸோ, ப²ஸ்ஸாயதனானம் அஸேஸவிராக³னிரோதா⁴ பபஞ்சனிரோதோ⁴ பபஞ்சவூபஸமோ’’தி. ததியம்.