8. அஸ்ஸக²ளுங்கஸுத்தம்

141. ‘‘தயோ ச, பி⁴க்க²வே, அஸ்ஸக²ளுங்கே தே³ஸேஸ்ஸாமி தயோ ச புரிஸக²ளுங்கே. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமே ச, பி⁴க்க²வே, தயோ அஸ்ஸக²ளுங்கா? இத⁴, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ஹோதி; ந வண்ணஸம்பன்னோ, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ அஸ்ஸக²ளுங்கா.

‘‘கதமே ச, பி⁴க்க²வே, தயோ புரிஸக²ளுங்கா? இத⁴, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ஹோதி; ந வண்ணஸம்பன்னோ, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ஹோதி; ந வண்ணஸம்பன்னோ ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² ஸம்ஸாதே³தி [ஸம்ஹீரேதி (க.)], நோ விஸ்ஸஜ்ஜேதி. இத³மஸ்ஸ ந வண்ணஸ்மிம் வதா³மி. ந கோ² பன லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ஹோதி; ந வண்ணஸம்பன்னோ, ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. ந பன லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. லாபீ⁴ கோ² பன ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ புரிஸக²ளுங்கா’’தி. அட்ட²மம்.