9. அஸ்ஸபரஸ்ஸஸுத்தம்

142. ‘‘தயோ ச, பி⁴க்க²வே, அஸ்ஸபரஸ்ஸே [அஸ்ஸஸத³ஸ்ஸே (ஸீ ஸ்யா. கம். பீ.)] தே³ஸேஸ்ஸாமி தயோ ச புரிஸபரஸ்ஸே [புரிஸஸத³ஸ்ஸே (ஸீ. ஸ்யா. கம். பீ.)]. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமே ச, பி⁴க்க²வே, தயோ அஸ்ஸபரஸ்ஸா? இத⁴, பி⁴க்க²வே, ஏகச்சோ அஸ்ஸபரஸ்ஸோ ஜவஸம்பன்னோ ஹோதி; ந வண்ணஸம்பன்னோ ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸபரஸ்ஸோ ஜவஸம்பன்னோ ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ அஸ்ஸபரஸ்ஸா.

‘‘கதமே ச, பி⁴க்க²வே, தயோ புரிஸபரஸ்ஸா? இத⁴, பி⁴க்க²வே, ஏகச்சோ புரிஸபரஸ்ஸோ ஜவஸம்பன்னோ ஹோதி; ந வண்ணஸம்பன்னோ ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச; ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, புரிஸபரஸ்ஸோ ஜவஸம்பன்னோ ஹோதி; ந வண்ணஸம்பன்னோ, ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினியே பஞ்ஹம் புட்டோ² ஸம்ஸாதே³தி, நோ விஸ்ஸஜ்ஜேதி. இத³மஸ்ஸ ந வண்ணஸ்மிம் வதா³மி. ந கோ² பன லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸபரஸ்ஸோ ஜவஸம்பன்னோ ஹோதி; ந வண்ணஸம்பன்னோ, ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச, ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. ந கோ² பன லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸபரஸ்ஸோ ஜவஸம்பன்னோ ச ஹோதி; வண்ணஸம்பன்னோ ச, ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச? இத⁴, பி⁴க்க²வே, பி⁴க்கு² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. லாபீ⁴ கோ² பன ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். இத³மஸ்ஸ ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ புரிஸபரஸ்ஸா’’தி. நவமம்.