6. கடுவியஸுத்தம்

129. ஏகம் ஸமயம் ப⁴க³வா பா³ராணஸியம் விஹரதி இஸிபதனே மிக³தா³யே. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய பா³ராணஸிம் பிண்டா³ய பாவிஸி. அத்³த³ஸா கோ² ப⁴க³வா கோ³யோக³பிலக்க²ஸ்மிம் [கோ³யோக³மிலக்க²ஸ்மிம் (ஸ்யா. கம். க.)] பிண்டா³ய சரமானோ [சரமானம் (க.)] அஞ்ஞதரம் பி⁴க்கு²ம் ரித்தஸ்ஸாத³ம் பா³ஹிரஸ்ஸாத³ம் முட்ட²ஸ்ஸதிம் அஸம்பஜானம் அஸமாஹிதம் விப்³ப⁴ந்தசித்தம் பாகதிந்த்³ரியம். தி³ஸ்வா தம் பி⁴க்கு²ம் ஏதத³வோச –

‘‘மா கோ² த்வம், பி⁴க்கு², அத்தானம் கடுவியமகாஸி. தம் வத பி⁴க்கு² கடுவியகதம் அத்தானம் ஆமக³ந்தே⁴ன [ஆமக³ந்தே⁴ (ஸீ. ஸ்யா. கம். பீ.)] அவஸ்ஸுதம் மக்கி²கா நானுபதிஸ்ஸந்தி நான்வாஸ்ஸவிஸ்ஸந்தீதி [நானுப³ந்தி⁴ஸ்ஸந்தி (க.)], நேதம் டா²னம் விஜ்ஜதீ’’தி. அத² கோ² ஸோ பி⁴க்கு² ப⁴க³வதா இமினா ஓவாதே³ன ஓவதி³தோ ஸம்வேக³மாபாதி³. அத² கோ² ப⁴க³வா பா³ராணஸியம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ பி⁴க்கூ² ஆமந்தேஸி –

‘‘இதா⁴ஹம், பி⁴க்க²வே, புப்³ப³ண்ஹஸமயம் நிவாஸேத்வா பத்தசீவரமாதா³ய பா³ராணஸிம் பிண்டா³ய பாவிஸிம். அத்³த³ஸம் கோ² அஹம், பி⁴க்க²வே, கோ³யோக³பிலக்க²ஸ்மிம் பிண்டா³ய சரமானோ அஞ்ஞதரம் பி⁴க்கு²ம் ரித்தஸ்ஸாத³ம் பா³ஹிரஸ்ஸாத³ம் முட்ட²ஸ்ஸதிம் அஸம்பஜானம் அஸமாஹிதம் விப்³ப⁴ந்தசித்தம் பாகதிந்த்³ரியம். தி³ஸ்வா தம் பி⁴க்கு²ம் ஏதத³வோசம் –

‘‘‘மா கோ² த்வம், பி⁴க்கு², அத்தானம் கடுவியமகாஸி. தம் வத பி⁴க்கு² கடுவியகதம் அத்தானம் ஆமக³ந்தே⁴ன அவஸ்ஸுதம் மக்கி²கா நானுபதிஸ்ஸந்தி நான்வாஸ்ஸவிஸ்ஸந்தீதி, நேதம் டா²னம் விஜ்ஜதீ’தி. அத² கோ², பி⁴க்க²வே, ஸோ பி⁴க்கு² மயா இமினா ஓவாதே³ன ஓவதி³தோ ஸம்வேக³மாபாதீ³’’தி. ஏவம் வுத்தே அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘கிம் நு கோ², ப⁴ந்தே, கடுவியம்? கோ ஆமக³ந்தோ⁴? கா மக்கி²கா’’தி?

‘‘அபி⁴ஜ்ஜா² கோ², பி⁴க்கு², கடுவியம்; ப்³யாபாதோ³ ஆமக³ந்தோ⁴; பாபகா அகுஸலா விதக்கா மக்கி²கா. தம் வத, பி⁴க்கு², கடுவியகதம் அத்தானம் ஆமக³ந்தே⁴ன அவஸ்ஸுதம் மக்கி²கா நானுபதிஸ்ஸந்தி நான்வாஸ்ஸவிஸ்ஸந்தீதி, நேதம் டா²னம் விஜ்ஜதீ’’தி.

‘‘அகு³த்தம் சக்கு²ஸோதஸ்மிம், இந்த்³ரியேஸு அஸம்வுதம்;

மக்கி²கானுபதிஸ்ஸந்தி, ஸங்கப்பா ராக³னிஸ்ஸிதா.

‘‘கடுவியகதோ பி⁴க்கு², ஆமக³ந்தே⁴ அவஸ்ஸுதோ;

ஆரகா ஹோதி நிப்³பா³னா, விகா⁴தஸ்ஸேவ பா⁴க³வா.

‘‘கா³மே வா யதி³ வாரஞ்ஞே, அலத்³தா⁴ ஸமத²மத்தனோ [ஸமமத்தனோ (ஸீ. ஸ்யா. கம்.), ஸம்மமத்தனோ (பீ.)];

பரேதி [சரேதி (ஸ்யா. க.)] பா³லோ து³ம்மேதோ⁴, மக்கி²காஹி புரக்க²தோ.

‘‘யே ச ஸீலேன ஸம்பன்னா, பஞ்ஞாயூபஸமேரதா;

உபஸந்தா ஸுக²ம் ஸேந்தி, நாஸயித்வான மக்கி²கா’’தி. ச²ட்ட²ம்;