10. லேக²ஸுத்தம்

133. ‘‘தயோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? பாஸாணலேகூ²பமோ புக்³க³லோ, பத²விலேகூ²பமோ புக்³க³லோ, உத³கலேகூ²பமோ புக்³க³லோ. கதமோ ச, பி⁴க்க²வே, பாஸாணலேகூ²பமோ புக்³க³லோ? இத⁴, பி⁴க்க²வே, ஏகச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ தீ³க⁴ரத்தம் அனுஸேதி. ஸேய்யதா²பி, பி⁴க்க²வே, பாஸாணே லேகா² ந கி²ப்பம் லுஜ்ஜதி வாதேன வா உத³கேன வா, சிரட்டி²திகா ஹோதி; ஏவமேவம் கோ², பி⁴க்க²வே, இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ தீ³க⁴ரத்தம் அனுஸேதி. அயம் வுச்சதி, பி⁴க்க²வே, பாஸாணலேகூ²பமோ புக்³க³லோ.

‘‘கதமோ ச, பி⁴க்க²வே, பத²விலேகூ²பமோ புக்³க³லோ? இத⁴, பி⁴க்க²வே, ஏகச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ ந தீ³க⁴ரத்தம் அனுஸேதி. ஸேய்யதா²பி, பி⁴க்க²வே, பத²வியா லேகா² கி²ப்பம் லுஜ்ஜதி வாதேன வா உத³கேன வா, ந சிரட்டி²திகா ஹோதி; ஏவமேவம் கோ², பி⁴க்க²வே, இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ ந தீ³க⁴ரத்தம் அனுஸேதி. அயம் வுச்சதி, பி⁴க்க²வே, பத²விலேகூ²பமோ புக்³க³லோ.

‘‘கதமோ ச, பி⁴க்க²வே, உத³கலேகூ²பமோ புக்³க³லோ? இத⁴, பி⁴க்க²வே, ஏகச்சோ புக்³க³லோ ஆகா³ள்ஹேனபி வுச்சமானோ ப²ருஸேனபி வுச்சமானோ அமனாபேனபி வுச்சமானோ ஸந்தி⁴யதிமேவ [… யேவ (ஸ்யா. கம்.) … சேவ (பீ.)] ஸம்ஸந்த³திமேவ [… யேவ (ஸ்யா. கம்.) … சேவ (பீ.)] ஸம்மோத³திமேவ [… யேவ (ஸ்யா. கம்.) … சேவ (பீ.)]. ஸேய்யதா²பி, பி⁴க்க²வே, உத³கே லேகா² கி²ப்பம்யேவ படிவிக³ச்ச²தி, ந சிரட்டி²திகா ஹோதி; ஏவமேவம் கோ², பி⁴க்க²வே, இதே⁴கச்சோ புக்³க³லோ ஆகா³ள்ஹேனபி வுச்சமானோ ப²ருஸேனபி வுச்சமானோ அமனாபேனபி வுச்சமானோ ஸந்தி⁴யதிமேவ ஸம்ஸந்த³திமேவ ஸம்மோத³திமேவ. அயம் வுச்சதி, பி⁴க்க²வே, உத³கலேகூ²பமோ புக்³க³லோ. இமே கோ², பி⁴க்க²வே, தயோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 115]. த³ஸமம்.

குஸினாரவக்³கோ³ தேரஸமோ.