5. விபத்திஸம்பதா³ஸுத்தம்

118. ‘‘திஸ்ஸோ இமா, பி⁴க்க²வே, விபத்தியோ. கதமா திஸ்ஸோ? ஸீலவிபத்தி, சித்தவிபத்தி, தி³ட்டி²விபத்தி. கதமா ச, பி⁴க்க²வே, ஸீலவிபத்தி? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி. அயம் வுச்சதி, பி⁴க்க²வே, ஸீலவிபத்தி.

‘‘கதமா ச, பி⁴க்க²வே, சித்தவிபத்தி? இத⁴, பி⁴க்க²வே, ஏகச்சோ அபி⁴ஜ்ஜா²லு ஹோதி ப்³யாபன்னசித்தோ. அயம் வுச்சதி, பி⁴க்க²வே, சித்தவிபத்தி.

‘‘கதமா ச, பி⁴க்க²வே, தி³ட்டி²விபத்தி? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி விபரீதத³ஸ்ஸனோ – ‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம், கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. அயம் வுச்சதி, பி⁴க்க²வே, தி³ட்டி²விபத்தி. ஸீலவிபத்திஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; சித்தவிபத்திஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; தி³ட்டி²விபத்திஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி. இமா கோ², பி⁴க்க²வே, திஸ்ஸோ விபத்தியோதி.

‘‘திஸ்ஸோ இமா, பி⁴க்க²வே, ஸம்பதா³. கதமா திஸ்ஸோ? ஸீலஸம்பதா³, சித்தஸம்பதா³, தி³ட்டி²ஸம்பதா³. கதமா ச, பி⁴க்க²வே, ஸீலஸம்பதா³? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி. அயம் வுச்சதி, பி⁴க்க²வே, ஸீலஸம்பதா³.

‘‘கதமா ச, பி⁴க்க²வே, சித்தஸம்பதா³? இத⁴, பி⁴க்க²வே, ஏகச்சோ அனபி⁴ஜ்ஜா²லு ஹோதி அப்³யாபன்னசித்தோ. அயம் வுச்சதி, பி⁴க்க²வே, சித்தஸம்பதா³.

‘‘கதமா ச, பி⁴க்க²வே, தி³ட்டி²ஸம்பதா³? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி அவிபரீதத³ஸ்ஸனோ – ‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. அயம் வுச்சதி, பி⁴க்க²வே, தி³ட்டி²ஸம்பதா³. ஸீலஸம்பதா³ஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; சித்தஸம்பதா³ஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; தி³ட்டி²ஸம்பதா³ஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. இமா கோ², பி⁴க்க²வே, திஸ்ஸோ ஸம்பதா³’’தி. பஞ்சமம்.