8. ப்³யாபன்னஸுத்தம்

111. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச – ‘‘சித்தே, க³ஹபதி, ப்³யாபன்னே காயகம்மம்பி ப்³யாபன்னம் ஹோதி, வசீகம்மம்பி ப்³யாபன்னம் ஹோதி, மனோகம்மம்பி ப்³யாபன்னம் ஹோதி. தஸ்ஸ ப்³யாபன்னகாயகம்மந்தஸ்ஸ ப்³யாபன்னவசீகம்மந்தஸ்ஸ ப்³யாபன்னமனோகம்மந்தஸ்ஸ ந ப⁴த்³த³கம் மரணம் ஹோதி, ந ப⁴த்³தி³கா காலங்கிரியா. ஸேய்யதா²பி, க³ஹபதி, கூடாகா³ரே து³ச்ச²ன்னே கூடம்பி ப்³யாபன்னம் ஹோதி, கோ³பானஸியோபி ப்³யாபன்னா ஹோந்தி, பி⁴த்திபி ப்³யாபன்னா ஹோதி; ஏவமேவம் கோ², க³ஹபதி, சித்தே ப்³யாபன்னே காயகம்மம்பி ப்³யாபன்னம் ஹோதி, வசீகம்மம்பி ப்³யாபன்னம் ஹோதி, மனோகம்மம்பி ப்³யாபன்னம் ஹோதி. தஸ்ஸ ப்³யாபன்னகாயகம்மந்தஸ்ஸ ப்³யாபன்னவசீகம்மந்தஸ்ஸ ப்³யாபன்னமனோகம்மந்தஸ்ஸ ந ப⁴த்³த³கம் மரணம் ஹோதி, ந ப⁴த்³தி³கா காலங்கிரியா.

‘‘சித்தே, க³ஹபதி, அப்³யாபன்னே காயகம்மம்பி அப்³யாபன்னம் ஹோதி, வசீகம்மம்பி அப்³யாபன்னம் ஹோதி, மனோகம்மம்பி அப்³யாபன்னம் ஹோதி. தஸ்ஸ அப்³யாபன்னகாயகம்மந்தஸ்ஸ அப்³யாபன்னவசீகம்மந்தஸ்ஸ அப்³யாபன்னமனோகம்மந்தஸ்ஸ ப⁴த்³த³கம் மரணம் ஹோதி, ப⁴த்³தி³கா காலங்கிரியா. ஸேய்யதா²பி, க³ஹபதி, கூடாகா³ரே ஸுச்ச²ன்னே கூடம்பி அப்³யாபன்னம் ஹோதி, கோ³பானஸியோபி அப்³யாபன்னா ஹோந்தி, பி⁴த்திபி அப்³யாபன்னா ஹோதி; ஏவமேவம் கோ², க³ஹபதி, சித்தே அப்³யாபன்னே காயகம்மம்பி அப்³யாபன்னம் ஹோதி, வசீகம்மம்பி அப்³யாபன்னம் ஹோதி, மனோகம்மம்பி அப்³யாபன்னம் ஹோதி. தஸ்ஸ அப்³யாபன்னகாயகம்மந்தஸ்ஸ…பே… அப்³யாபன்னமனோகம்மந்தஸ்ஸ ப⁴த்³த³கம் மரணம் ஹோதி, ப⁴த்³தி³கா காலங்கிரியா’’தி. அட்ட²மம்.