8. ததியஸிக்கா²ஸுத்தம்

89. ‘‘ஸாதி⁴கமித³ம், பி⁴க்க²வே, தி³யட்³ட⁴ஸிக்கா²பத³ஸதம் அன்வத்³த⁴மாஸம் உத்³தே³ஸம் ஆக³ச்ச²தி யத்த² அத்தகாமா குலபுத்தா ஸிக்க²ந்தி. திஸ்ஸோ இமா, பி⁴க்க²வே, ஸிக்கா² யத்தே²தம் ஸப்³ப³ம் ஸமோதா⁴னம் க³ச்ச²தி. கதமா திஸ்ஸோ? அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா² – இமா கோ², பி⁴க்க²வே, திஸ்ஸோ ஸிக்கா² யத்தே²தம் ஸப்³ப³ம் ஸமோதா⁴னம் க³ச்ச²தி.

‘‘இத⁴, பி⁴க்க²வே, பி⁴க்கு² ஸீலேஸு பரிபூரகாரீ ஹோதி ஸமாதி⁴ஸ்மிம் பரிபூரகாரீ பஞ்ஞாய பரிபூரகாரீ. ஸோ யானி தானி கு²த்³தா³னுகு²த்³த³கானி ஸிக்கா²பதா³னி தானி ஆபஜ்ஜதிபி வுட்டா²திபி. தம் கிஸ்ஸ ஹேது? ந ஹி மேத்த², பி⁴க்க²வே, அப⁴ப்³ப³தா வுத்தா. யானி ச கோ² தானி ஸிக்கா²பதா³னி ஆதி³ப்³ரஹ்மசரியகானி ப்³ரஹ்மசரியஸாருப்பானி தத்த² து⁴வஸீலோ ச ஹோதி டி²தஸீலோ ச, ஸமாதா³ய ஸிக்க²தி ஸிக்கா²பதே³ஸு. ஸோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. தம் வா பன அனபி⁴ஸம்ப⁴வம் அப்படிவிஜ்ஜ²ம் பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா அந்தராபரினிப்³பா³யீ ஹோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா உபஹச்சபரினிப்³பா³யீ ஹோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா அஸங்கா²ரபரினிப்³பா³யீ ஹோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஸஸங்கா²ரபரினிப்³பா³யீ ஹோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா உத்³த⁴ம்ஸோதோ ஹோதி அகனிட்ட²கா³மீ தம் வா பன அனபி⁴ஸம்ப⁴வம் அப்படிவிஜ்ஜ²ம் திண்ணம் ஸம்யோஜனானம் பரிக்க²யா, ராக³தோ³ஸமோஹானம் தனுத்தா ஸகதா³கா³மீ ஹோதி, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் திண்ணம் ஸம்யோஜனானம் பரிக்க²யா ஏகபீ³ஜீ ஹோதி, ஏகம்யேவ மானுஸகம் ப⁴வம் நிப்³ப³த்தேத்வா து³க்க²ஸ்ஸந்தம் கரோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் திண்ணம் ஸம்யோஜனானம் பரிக்க²யா கோலம்கோலோ ஹோதி, த்³வே வா தீணி வா குலானி ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி. தம் வா பன அனபி⁴ஸம்ப⁴வம் அப்படிவிஜ்ஜ²ம் திண்ணம் ஸம்யோஜனானம் பரிக்க²யா ஸத்தக்க²த்துபரமோ ஹோதி, ஸத்தக்க²த்துபரமம் தே³வே ச மனுஸ்ஸே ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி.

‘‘இதி கோ², பி⁴க்க²வே, பரிபூரம் பரிபூரகாரீ ஆராதே⁴தி பதே³ஸம் பதே³ஸகாரீ. அவஞ்ஜா²னித்வேவாஹம், பி⁴க்க²வே, ஸிக்கா²பதா³னி வதா³மீ’’தி. அட்ட²மம்.