4. பரிப்³பா³ஜகஸுத்தம்

55. அத² கோ² அஞ்ஞதரோ ப்³ராஹ்மணபரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா…பே… ஏகமந்தம் நிஸின்னோ கோ² ஸோ ப்³ராஹ்மணபரிப்³பா³ஜகோ ப⁴க³வந்தம் ஏதத³வோச – ‘‘‘ஸந்தி³ட்டி²கோ த⁴ம்மோ ஸந்தி³ட்டி²கோ த⁴ம்மோ’தி, போ⁴ கோ³தம, வுச்சதி. கித்தாவதா நு கோ², போ⁴ கோ³தம, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி?

‘‘ரத்தோ கோ², ப்³ராஹ்மண, ராகே³ன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ராகே³ பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி.

‘‘ரத்தோ கோ², ப்³ராஹ்மண, ராகே³ன அபி⁴பூ⁴தோ பரியாதி³ன்னசித்தோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ராகே³ பஹீனே நேவ காயேன து³ச்சரிதம் சரதி, ந வாசாய து³ச்சரிதம் சரதி, ந மனஸா து³ச்சரிதம் சரதி.

‘‘ரத்தோ கோ², ப்³ராஹ்மண, ராகே³ன அபி⁴பூ⁴தோ பரியாதி³ன்னசித்தோ அத்தத்த²ம்பி யதா²பூ⁴தம் நப்பஜானாதி, பரத்த²ம்பி யதா²பூ⁴தம் நப்பஜானாதி, உப⁴யத்த²ம்பி யதா²பூ⁴தம் நப்பஜானாதி. ராகே³ பஹீனே அத்தத்த²ம்பி யதா²பூ⁴தம் பஜானாதி, பரத்த²ம்பி யதா²பூ⁴தம் பஜானாதி, உப⁴யத்த²ம்பி யதா²பூ⁴தம் பஜானாதி. ஏவம்பி கோ², ப்³ராஹ்மண, ஸந்தி³ட்டி²கோ த⁴ம்மோ ஹோதி…பே….

‘‘து³ட்டோ² கோ², ப்³ராஹ்மண, தோ³ஸேன…பே… மூள்ஹோ கோ², ப்³ராஹ்மண, மோஹேன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி. மோஹே பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி.

‘‘மூள்ஹோ கோ², ப்³ராஹ்மண, மோஹேன அபி⁴பூ⁴தோ பரியாதி³ன்னசித்தோ, காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. மோஹே பஹீனே நேவ காயேன து³ச்சரிதம் சரதி, ந வாசாய து³ச்சரிதம் சரதி, ந மனஸா து³ச்சரிதம் சரதி.

‘‘மூள்ஹோ கோ², ப்³ராஹ்மண, மோஹேன அபி⁴பூ⁴தோ பரியாதி³ன்னசித்தோ அத்தத்த²ம்பி யதா²பூ⁴தம் நப்பஜானாதி, பரத்த²ம்பி யதா²பூ⁴தம் நப்பஜானாதி, உப⁴யத்த²ம்பி யதா²பூ⁴தம் நப்பஜானாதி. மோஹே பஹீனே அத்தத்த²ம்பி யதா²பூ⁴தம் பஜானாதி, பரத்த²ம்பி யதா²பூ⁴தம் பஜானாதி, உப⁴யத்த²ம்பி யதா²பூ⁴தம் பஜானாதி. ஏவம் கோ², ப்³ராஹ்மண, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி.

‘‘அபி⁴க்கந்தம், போ⁴ கோ³தம…பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. சதுத்த²ம்.