5. நிப்³பு³தஸுத்தம்

56. அத² கோ² ஜாணுஸ்ஸோணி ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஜாணுஸ்ஸோணி ப்³ராஹ்மணோ ப⁴க³வந்தம் ஏதத³வோச – ‘‘‘ஸந்தி³ட்டி²கம் நிப்³பா³னம் ஸந்தி³ட்டி²கம் நிப்³பா³ன’ந்தி, போ⁴ கோ³தம, வுச்சதி. கித்தாவதா நு கோ², போ⁴ கோ³தம, ஸந்தி³ட்டி²கம் நிப்³பா³னம் ஹோதி அகாலிகம் ஏஹிபஸ்ஸிகம் ஓபனேய்யிகம் பச்சத்தம் வேதி³தப்³ப³ம் விஞ்ஞூஹீ’’தி?

‘‘ரத்தோ கோ², ப்³ராஹ்மண, ராகே³ன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ராகே³ பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ஏவம்பி கோ², ப்³ராஹ்மண, ஸந்தி³ட்டி²கம் நிப்³பா³னம் ஹோதி.

‘‘து³ட்டோ² கோ², ப்³ராஹ்மண…பே… மூள்ஹோ கோ², ப்³ராஹ்மண, மோஹேன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி. மோஹே பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி. ஏவம்பி கோ², ப்³ராஹ்மண, ஸந்தி³ட்டி²கம் நிப்³பா³னம் ஹோதி.

‘‘யதோ கோ² அயம், ப்³ராஹ்மண [யதோ ச கோ² அயம் ப்³ராஹ்மண (ஸீ.), யதோ கோ² ப்³ராஹ்மண அகாலிகம் ஏஹிபஸ்ஸிகம் ஓபனேய்யிகம் பச்சத்தம் வேதி³தப்³ப³ம் (க.)], அனவஸேஸம் ராக³க்க²யம் படிஸம்வேதே³தி, அனவஸேஸம் தோ³ஸக்க²யம் படிஸம்வேதே³தி, அனவஸேஸம் மோஹக்க²யம் படிஸம்வேதே³தி; ஏவம் கோ², ப்³ராஹ்மண, ஸந்தி³ட்டி²கம் நிப்³பா³னம் ஹோதி அகாலிகம் ஏஹிபஸ்ஸிகம் ஓபனேய்யிகம் பச்சத்தம் வேதி³தப்³ப³ம் விஞ்ஞூஹீ’’தி. ‘‘அபி⁴க்கந்தம், போ⁴ கோ³தம…பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. பஞ்சமம்.