1. பட²மஅத⁴ம்மஸுத்தம்

113. [அ. நி. 10.171] ‘‘அத⁴ம்மோ ச, பி⁴க்க²வே, வேதி³தப்³போ³ அனத்தோ² ச; த⁴ம்மோ ச வேதி³தப்³போ³ அத்தோ² ச. அத⁴ம்மஞ்ச விதி³த்வா அனத்த²ஞ்ச, த⁴ம்மஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³ம்.

‘‘கதமோ ச, பி⁴க்க²வே, அத⁴ம்மோ ச அனத்தோ² ச? மிச்சா²தி³ட்டி², மிச்சா²ஸங்கப்போ, மிச்சா²வாசா, மிச்சா²கம்மந்தோ, மிச்சா²ஆஜீவோ, மிச்சா²வாயாமோ, மிச்சா²ஸதி, மிச்சா²ஸமாதி⁴, மிச்சா²ஞாணம், மிச்சா²விமுத்தி – அயம் வுச்சதி, பி⁴க்க²வே, அத⁴ம்மோ ச அனத்தோ² ச.

‘‘கதமோ ச, பி⁴க்க²வே, த⁴ம்மோ ச அத்தோ² ச? ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴, ஸம்மாஞாணம், ஸம்மாவிமுத்தி – அயம் வுச்சதி, பி⁴க்க²வே, த⁴ம்மோ ச அத்தோ² ச.

‘‘‘அத⁴ம்மோ ச, பி⁴க்க²வே, வேதி³தப்³போ³ அனத்தோ² ச; த⁴ம்மோ ச வேதி³தப்³போ³ அத்தோ² ச. அத⁴ம்மஞ்ச விதி³த்வா அனத்த²ஞ்ச, த⁴ம்மஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³’ந்தி, இதி யம் தம் வுத்தம், இத³மேதம் படிச்ச வுத்த’’ந்தி. பட²மம்.