2. து³தியஅத⁴ம்மஸுத்தம்

114. ‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச. அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³ம்.

‘‘கதமோ ச, பி⁴க்க²வே, அத⁴ம்மோ, கதமோ ச த⁴ம்மோ, கதமோ ச அனத்தோ², கதமோ ச அத்தோ²?

‘‘மிச்சா²தி³ட்டி², பி⁴க்க²வே, அத⁴ம்மோ; ஸம்மாதி³ட்டி² த⁴ம்மோ; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²ஸங்கப்போ, பி⁴க்க²வே, அத⁴ம்மோ; ஸம்மாஸங்கப்போ த⁴ம்மோ; யே ச மிச்சா²ஸங்கப்பபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாஸங்கப்பபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²வாசா, பி⁴க்க²வே, அத⁴ம்மோ; ஸம்மாவாசா த⁴ம்மோ; யே ச மிச்சா²வாசாபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாவாசாபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²கம்மந்தோ, பி⁴க்க²வே, அத⁴ம்மோ; ஸம்மாகம்மந்தோ த⁴ம்மோ; யே ச மிச்சா²கம்மந்தபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாகம்மந்தபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²ஆஜீவோ, பி⁴க்க²வே, அத⁴ம்மோ; ஸம்மாஆஜீவோ த⁴ம்மோ; யே ச மிச்சா²ஆஜீவபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாஆஜீவபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²வாயாமோ, பி⁴க்க²வே, அத⁴ம்மோ; ஸம்மாவாயாமோ த⁴ம்மோ; யே ச மிச்சா²வாயாமபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாவாயாமபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²ஸதி, பி⁴க்க²வே, அத⁴ம்மோ; ஸம்மாஸதி த⁴ம்மோ; யே ச மிச்சா²ஸதிபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாஸதிபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²ஸமாதி⁴, பி⁴க்க²வே, அத⁴ம்மோ; ஸம்மாஸமாதி⁴ த⁴ம்மோ; யே ச மிச்சா²ஸமாதி⁴பச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாஸமாதி⁴பச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²ஞாணம், பி⁴க்க²வே, அத⁴ம்மோ; ஸம்மாஞாணம் த⁴ம்மோ; யே ச மிச்சா²ஞாணபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாஞாணபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘மிச்சா²விமுத்தி, பி⁴க்க²வே, அத⁴ம்மோ; ஸம்மாவிமுத்தி த⁴ம்மோ; யே ச மிச்சா²விமுத்திபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாவிமுத்திபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச. அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³’ந்தி, இதி யம் தம் வுத்தம், இத³மேதம் படிச்ச வுத்த’’ந்தி. து³தியம்.