8. திகிச்ச²கஸுத்தம்

108. ‘‘திகிச்ச²கா, பி⁴க்க²வே, விரேசனம் தே³ந்தி பித்தஸமுட்டா²னானம்பி ஆபா³தா⁴னம் படிகா⁴தாய, ஸேம்ஹஸமுட்டா²னானம்பி ஆபா³தா⁴னம் படிகா⁴தாய, வாதஸமுட்டா²னானம்பி ஆபா³தா⁴னம் படிகா⁴தாய. அத்தே²தம், பி⁴க்க²வே, விரேசனம்; ‘நேதம் நத்தீ²’தி வதா³மி. தஞ்ச கோ² ஏதம், பி⁴க்க²வே, விரேசனம் ஸம்பஜ்ஜதிபி விபஜ்ஜதிபி.

‘‘அஹஞ்ச கோ², பி⁴க்க²வே, அரியம் விரேசனம் தே³ஸேஸ்ஸாமி, யம் விரேசனம் ஸம்பஜ்ஜதியேவ நோ விபஜ்ஜதி, யம் விரேசனம் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி, ஜராத⁴ம்மா ஸத்தா ஜராய பரிமுச்சந்தி, மரணத⁴ம்மா ஸத்தா மரணேன பரிமுச்சந்தி, ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமஞ்ச தம், பி⁴க்க²வே, அரியம் விரேசனம், யம் விரேசனம் ஸம்பஜ்ஜதியேவ நோ விபஜ்ஜதி, யம் விரேசனம் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி, ஜராத⁴ம்மா ஸத்தா ஜராய பரிமுச்சந்தி, மரணத⁴ம்மா ஸத்தா மரணேன பரிமுச்சந்தி, ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி?

‘‘ஸம்மாதி³ட்டி²கஸ்ஸ, பி⁴க்க²வே, மிச்சா²தி³ட்டி² விரித்தா ஹோதி; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ விரித்தா ஹோந்தி; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி.

‘‘ஸம்மாஸங்கப்பஸ்ஸ, பி⁴க்க²வே, மிச்சா²ஸங்கப்போ விரித்தோ ஹோதி…பே… ஸம்மாவாசஸ்ஸ, பி⁴க்க²வே, மிச்சா²வாசா விரித்தா ஹோதி… ஸம்மாகம்மந்தஸ்ஸ, பி⁴க்க²வே, மிச்சா²கம்மந்தோ விரித்தோ ஹோதி… ஸம்மாஆஜீவஸ்ஸ, பி⁴க்க²வே, மிச்சா²ஆஜீவோ விரித்தோ ஹோதி… ஸம்மாவாயாமஸ்ஸ, பி⁴க்க²வே, மிச்சா²வாயாமோ விரித்தோ ஹோதி… ஸம்மாஸதிஸ்ஸ, பி⁴க்க²வே, மிச்சா²ஸதி விரித்தா ஹோதி… ஸம்மாஸமாதி⁴ஸ்ஸ, பி⁴க்க²வே, மிச்சா²ஸமாதி⁴ விரித்தோ ஹோதி… ஸம்மாஞாணிஸ்ஸ, பி⁴க்க²வே, மிச்சா²ஞாணம் விரித்தம் ஹோதி…பே….

‘‘ஸம்மாவிமுத்திஸ்ஸ, பி⁴க்க²வே, மிச்சா²விமுத்தி விரித்தா ஹோதி; யே ச மிச்சா²விமுத்திபச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ விரித்தா ஹோந்தி; ஸம்மாவிமுத்திபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி. இத³ம் கோ² தம், பி⁴க்க²வே, அரியம் விரேசனம் யம் விரேசனம் ஸம்பஜ்ஜதியேவ நோ விபஜ்ஜதி, யம் விரேசனம் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி…பே… ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தீ’’தி. அட்ட²மம்.