6. கோகனுத³ஸுத்தம்

96. ‘‘ஏகம் ஸமயம் ஆயஸ்மா ஆனந்தோ³ ராஜக³ஹே விஹரதி தபோதா³ராமே. அத² கோ² ஆயஸ்மா ஆனந்தோ³ ரத்தியா பச்சூஸஸமயம் பச்சுட்டா²ய யேன தபோதா³ தேனுபஸங்கமி க³த்தானி பரிஸிஞ்சிதும். தபோதா³ய [தபோதே³ (க.)] க³த்தானி பரிஸிஞ்சித்வா பச்சுத்தரித்வா ஏகசீவரோ அட்டா²ஸி க³த்தானி புப்³பா³பயமானோ. கோகனுதோ³பி கோ² பரிப்³பா³ஜகோ ரத்தியா பச்சூஸஸமயம் பச்சுட்டா²ய யேன தபோதா³ தேனுபஸங்கமி க³த்தானி பரிஸிஞ்சிதும்.

அத்³த³ஸா கோ² கோகனுதோ³ பரிப்³பா³ஜகோ ஆயஸ்மந்தம் ஆனந்த³ம் தூ³ரதோவ ஆக³ச்ச²ந்தம். தி³ஸ்வான ஆயஸ்மந்தம் ஆனந்த³ம் ஏதத³வோச – ‘‘க்வேத்த² [கோ தேத்த² (ஸீ.), க்வத்த² (பீ. க.)], ஆவுஸோ’’தி? ‘‘அஹமாவுஸோ, பி⁴க்கூ²’’தி.

‘‘கதமேஸம், ஆவுஸோ, பி⁴க்கூ²ன’’ந்தி? ‘‘ஸமணானம், ஆவுஸோ, ஸக்யபுத்தியான’’ந்தி.

‘‘புச்சே²ய்யாம மயம் ஆயஸ்மந்தம் கிஞ்சிதே³வ தே³ஸம், ஸசே ஆயஸ்மா ஓகாஸம் கரோதி பஞ்ஹஸ்ஸ வேய்யாகரணாயா’’தி. ‘‘புச்சா²வுஸோ, ஸுத்வா வேதி³ஸ்ஸாமா’’தி.

‘‘கிம் நு கோ², போ⁴, ‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² [ஏவம்தி³ட்டி²கோ (ஸ்யா.)] ப⁴வ’’ந்தி? ‘‘ந கோ² அஹம், ஆவுஸோ, ஏவம்தி³ட்டி² – ‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴, ‘அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வ’’ந்தி? ‘‘ந கோ² அஹம், ஆவுஸோ, ஏவம்தி³ட்டி² – ‘அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் நு கோ², போ⁴, அந்தவா லோகோ…பே… அனந்தவா லோகோ… தம் ஜீவம் தம் ஸரீரம்… அஞ்ஞம் ஜீவம் அஞ்ஞம் ஸரீரம்… ஹோதி ததா²க³தோ பரம் மரணா… ந ஹோதி ததா²க³தோ பரம் மரணா… ஹோதி ச ந ச ஹோதி ததா²க³தோ பரம் மரணா… நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வ’’ந்தி? ‘‘ந கோ² அஹம், ஆவுஸோ, ஏவம்தி³ட்டி² – ‘நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’’ந்தி.

‘‘தேன ஹி ப⁴வம் ந ஜானாதி, ந பஸ்ஸதீ’’தி? ‘‘ந கோ² அஹம், ஆவுஸோ, ந ஜானாமி ந பஸ்ஸாமி. ஜானாமஹம், ஆவுஸோ, பஸ்ஸாமீ’’தி.

‘‘‘கிம் நு கோ², போ⁴, ஸஸ்ஸதோ லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வ’ந்தி, இதி புட்டோ² ஸமானோ – ‘ந கோ² அஹம், ஆவுஸோ, ஏவம்தி³ட்டி² – ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி.

‘‘‘கிம் பன, போ⁴, அஸஸ்ஸதோ லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வ’ந்தி, இதி புட்டோ² ஸமானோ – ‘ந கோ² அஹம், ஆவுஸோ, ஏவம்தி³ட்டி² – அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி.

‘‘கிம் நு கோ², போ⁴, அந்தவா லோகோ…பே… அனந்தவா லோகோ… தம் ஜீவம் தம் ஸரீரம்… அஞ்ஞம் ஜீவம் அஞ்ஞம் ஸரீரம்… ஹோதி ததா²க³தோ பரம் மரணா… ந ஹோதி ததா²க³தோ பரம் மரணா… ஹோதி ச ந ச ஹோதி ததா²க³தோ பரம் மரணா… நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வந்தி, இதி புட்டோ² ஸமானோ – ‘ந கோ² அஹம், ஆவுஸோ, ஏவம்தி³ட்டி² – நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி வதே³ஸி.

‘‘‘தேன ஹி ப⁴வம் ந ஜானாதி ந பஸ்ஸதீ’தி, இதி புட்டோ² ஸமானோ – ‘ந கோ² அஹம், ஆவுஸோ, ந ஜானாமி ந பஸ்ஸாமி. ஜானாமஹம், ஆவுஸோ, பஸ்ஸாமீ’தி வதே³ஸி. யதா² கத²ம் பனாவுஸோ, இமஸ்ஸ பா⁴ஸிதஸ்ஸ அத்தோ² த³ட்ட²ப்³போ³’’தி?

‘‘‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி கோ², ஆவுஸோ, தி³ட்டி²க³தமேதம். ‘அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி கோ², ஆவுஸோ, தி³ட்டி²க³தமேதம். அந்தவா லோகோ…பே… அனந்தவா லோகோ… தம் ஜீவம் தம் ஸரீரம்… அஞ்ஞம் ஜீவம் அஞ்ஞம் ஸரீரம்… ஹோதி ததா²க³தோ பரம் மரணா… ந ஹோதி ததா²க³தோ பரம் மரணா… ஹோதி ச ந ச ஹோதி ததா²க³தோ பரம் மரணா… ‘நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி கோ², ஆவுஸோ, தி³ட்டி²க³தமேதம்.

‘‘யாவதா, ஆவுஸோ, தி³ட்டி² [தி³ட்டி²க³தா (ஸப்³ப³த்த²)] யாவதா தி³ட்டி²ட்டா²னம் தி³ட்டி²அதி⁴ட்டா²னம் தி³ட்டி²பரியுட்டா²னம் தி³ட்டி²ஸமுட்டா²னம் தி³ட்டி²ஸமுக்³கா⁴தோ [யாவதா தி³ட்டி²ட்டா²ன அதி⁴ட்டா²ன பரியுட்டா²ன ஸமுட்டா²ன ஸமுக்³கா⁴தோ (ஸீ. பீ.)], தமஹம் ஜானாமி தமஹம் பஸ்ஸாமி. தமஹம் ஜானந்தோ தமஹம் பஸ்ஸந்தோ க்யாஹம் வக்கா²மி – ‘ந ஜானாமி ந பஸ்ஸாமீ’தி? ஜானாமஹம், ஆவுஸோ, பஸ்ஸாமீ’’தி.

‘‘கோ நாமோ ஆயஸ்மா, கத²ஞ்ச பனாயஸ்மந்தம் ஸப்³ரஹ்மசாரீ ஜானந்தீ’’தி? ‘‘‘ஆனந்தோ³’தி கோ² மே, ஆவுஸோ, நாமம். ‘ஆனந்தோ³’தி ச பன மம் ஸப்³ரஹ்மசாரீ ஜானந்தீ’’தி. ‘‘மஹாசரியேன வத கிர, போ⁴, ஸத்³தி⁴ம் மந்தயமானா ந ஜானிம்ஹ – ‘ஆயஸ்மா ஆனந்தோ³’தி. ஸசே ஹி மயம் ஜானேய்யாம – ‘அயம் ஆயஸ்மா ஆனந்தோ³’தி, ஏத்தகம்பி நோ நப்படிபா⁴யேய்ய [நப்படிபா⁴ஸேய்யாம (க.) நப்படிபா⁴ஸேய்ய (ப³ஹூஸு) ம. நி. 3.216 பஸ்ஸிதப்³ப³ம்]. க²மது ச மே ஆயஸ்மா ஆனந்தோ³’’தி. ச²ட்ட²ம்.