8. து³தியனளகபானஸுத்தம்

68. ஏகம் ஸமயம் ப⁴க³வா நளகபானே விஹரதி பலாஸவனே. தேன கோ² பன ஸமயேன ப⁴க³வா தத³ஹுபோஸதே² பி⁴க்கு²ஸங்க⁴பரிவுதோ நிஸின்னோ ஹோதி. அத² கோ² ப⁴க³வா ப³ஹுதே³வ ரத்திம் பி⁴க்கூ²னம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா துண்ஹீபூ⁴தம் துண்ஹீபூ⁴தம் பி⁴க்கு²ஸங்க⁴ம் அனுவிலோகேத்வா ஆயஸ்மந்தம் ஸாரிபுத்தம் ஆமந்தேஸி –

‘‘விக³ததி²னமித்³தோ⁴ கோ², ஸாரிபுத்த, பி⁴க்கு²ஸங்கோ⁴. படிபா⁴து தம், ஸாரிபுத்த, பி⁴க்கூ²னம் த⁴ம்மீ கதா². பிட்டி² மே ஆகி³லாயதி; தமஹம் ஆயமிஸ்ஸாமீ’’தி. ‘‘ஏவம், ப⁴ந்தே’’தி கோ² ஆயஸ்மா ஸாரிபுத்தோ ப⁴க³வதோ பச்சஸ்ஸோஸி.

அத² கோ² ப⁴க³வா சதுக்³கு³ணம் ஸங்கா⁴டிம் பஞ்ஞாபேத்வா த³க்கி²ணேன பஸ்ஸேன ஸீஹஸேய்யம் கப்பேஸி பாதே³ பாத³ம் அச்சாதா⁴ய ஸதோ ஸம்பஜானோ உட்டா²னஸஞ்ஞம் மனஸி கரித்வா. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ, பி⁴க்க²வே’’தி! ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸும். ஆயஸ்மா ஸாரிபுத்தோ ஏதத³வோச –

‘‘யஸ்ஸ கஸ்ஸசி, ஆவுஸோ, ஸத்³தா⁴ நத்தி² குஸலேஸு த⁴ம்மேஸு, ஹிரீ நத்தி²… ஓத்தப்பம் நத்தி²… வீரியம் நத்தி²… பஞ்ஞா நத்தி²… ஸோதாவதா⁴னம் நத்தி²… த⁴ம்மதா⁴ரணா நத்தி²… அத்தூ²பபரிக்கா² நத்தி²… த⁴ம்மானுத⁴ம்மப்படிபத்தி நத்தி²… அப்பமாதோ³ நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴. ஸேய்யதா²பி, ஆவுஸோ, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன ஹாயதி மண்ட³லேன ஹாயதி ஆபா⁴ய ஹாயதி ஆரோஹபரிணாஹேன; ஏவமேவம் கோ², ஆவுஸோ, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு, ஹிரீ நத்தி²… ஓத்தப்பம் நத்தி²… வீரியம் நத்தி²… பஞ்ஞா நத்தி²… ஸோதாவதா⁴னம் நத்தி²… த⁴ம்மதா⁴ரணா நத்தி²… அத்தூ²பபரிக்கா² நத்தி²… த⁴ம்மானுத⁴ம்மப்படிபத்தி நத்தி²… அப்பமாதோ³ நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴.

‘‘யஸ்ஸ கஸ்ஸசி, ஆவுஸோ, ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி²… ஓத்தப்பம் அத்தி²… வீரியம் அத்தி²… பஞ்ஞா அத்தி²… ஸோதாவதா⁴னம் அத்தி²… த⁴ம்மதா⁴ரணா அத்தி²… அத்தூ²பபரிக்கா² அத்தி²… த⁴ம்மானுத⁴ம்மப்படிபத்தி அத்தி²… அப்பமாதோ³ அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி. ஸேய்யதா²பி, ஆவுஸோ, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன வட்³ட⁴தி மண்ட³லேன வட்³ட⁴தி ஆபா⁴ய வட்³ட⁴தி ஆரோஹபரிணாஹேன; ஏவமேவம் கோ², ஆவுஸோ, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு…பே… அப்பமாதோ³ அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானீ’’தி.

அத² கோ² ப⁴க³வா பச்சுட்டா²ய ஆயஸ்மந்தம் ஸாரிபுத்தம் ஆமந்தேஸி – ‘‘ஸாது⁴ ஸாது⁴, ஸாரிபுத்த! யஸ்ஸ கஸ்ஸசி, ஸாரிபுத்த, ஸத்³தா⁴ நத்தி² குஸலேஸு த⁴ம்மேஸு ஹிரீ நத்தி²… ஓத்தப்பம் நத்தி²… பஞ்ஞா நத்தி²… வீரியம் நத்தி²… ஸோதாவதா⁴னம் நத்தி²… த⁴ம்மதா⁴ரணா நத்தி²… அத்தூ²பபரிக்கா² நத்தி²… த⁴ம்மானுத⁴ம்மப்படிபத்தி நத்தி²… அப்பமாதோ³ நத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴. ஸேய்யதா²பி, ஸாரிபுத்த, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன ஹாயதி மண்ட³லேன ஹாயதி ஆபா⁴ய ஹாயதி ஆரோஹபரிணாஹேன; ஏவமேவம் கோ², ஸாரிபுத்த, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு…பே… அப்பமாதோ³ நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴.

‘‘யஸ்ஸ கஸ்ஸசி, ஸாரிபுத்த, ஸத்³தா⁴ அத்தி² குஸலேஸு த⁴ம்மேஸு ஹிரீ அத்தி²… ஓத்தப்பம் அத்தி²… வீரியம் அத்தி²… பஞ்ஞா அத்தி²… ஸோதாவதா⁴னம் அத்தி²… த⁴ம்மதா⁴ரணா அத்தி²… அத்தூ²பபரிக்கா² அத்தி²… த⁴ம்மானுத⁴ம்மப்படிபத்தி அத்தி²… அப்பமாதோ³ அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி. ஸேய்யதா²பி, ஸாரிபுத்த, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன வட்³ட⁴தி மண்ட³லேன வட்³ட⁴தி ஆபா⁴ய வட்³ட⁴தி ஆரோஹபரிணாஹேன; ஏவமேவம் கோ², ஸாரிபுத்த, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு…பே… அப்பமாதோ³ அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானீ’’தி. அட்ட²மம்.