7. සත්තමසික්ඛාපදං
864. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන සම්බහුලා භික්ඛුනියො කොසලෙසු ජනපදෙ සාවත්ථිං ගච්ඡන්තියො සායං අඤ්ඤතරං ගාමං උපගන්ත්වා අඤ්ඤතරං බ්‍රාහ්මණකුලං උපසඞ්කමිත්වා ඔකාසං යාචිංසු. අථ ඛො සා බ්‍රාහ්මණී තා භික්ඛුනියො එතදවොච – ‘‘ආගමෙථ, අය්‍යෙ, යාව බ්‍රාහ්මණො ආගච්ඡතී’’ති. භික්ඛුනියො – ‘‘යාව බ්‍රාහ්මණො ආගච්ඡතී’’ති සෙය්‍යං සන්ථරිත්වා එකච්චා නිසීදිංසු එකච්චා නිපජ්ජිංසු. අථ ඛො සො බ්‍රාහ්මණො රත්තිං ආගන්ත්වා තං බ්‍රාහ්මණිං එතදවොච – ‘‘කා ඉමා’’ති? ‘‘භික්ඛුනියො, අය්‍යා’’ති. ‘‘නික්කඩ්ඪථ ඉමා මුණ්ඩා බන්ධකිනියො’’ති, ඝරතො නික්කඩ්ඪාපෙසි. අථ ඛො තා භික්ඛුනියො සාවත්ථිං ගන්ත්වා භික්ඛුනීනං එතමත්ථං ආරොචෙසුං. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛුනියො විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්‍යං සන්ථරිත්වා අභිනිසීදිස්සන්තිපි අභිනිපජ්ජිස්සන්තිපී’’ති…පෙ… සච්චං කිර, භික්ඛවෙ, භික්ඛුනියො විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්‍යං සන්ථරිත්වා අභිනිසීදන්තිපි අභිනිපජ්ජන්තිපීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, භික්ඛුනියො විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්‍යං සන්ථරිත්වා අභිනිසීදිස්සන්තිපි අභිනිපජ්ජිස්සන්තිපි! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –
865. ‘‘යා පන භික්ඛුනී විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්‍යං සන්ථරිත්වා වා සන්ථරාපෙත්වා වා අභිනිසීදෙය්‍ය වා අභිනිපජ්ජෙය්‍ය වා, පාචිත්තිය’’න්ති.
866. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.
විකාලො නාම අත්ථඞ්ගතෙ සූරියෙ යාව අරුණුග්ගමනා.
කුලං නාම චත්තාරි කුලානි – ඛත්තියකුලං, බ්‍රාහ්මණකුලං, වෙස්සකුලං සුද්දකුලං. උපසඞ්කමිත්වාති තත්ථ ගන්ත්වා.
සාමිකෙ අනාපුච්ඡාති යො තස්මිං කුලෙ මනුස්සො සාමිකො දාතුං, තං අනාපුච්ඡා.
සෙය්‍යං නාම අන්තමසො පණ්ණසන්ථාරොපි. සන්ථරිත්වාති සයං සන්ථරිත්වා. සන්ථරාපෙත්වාති අඤ්ඤං සන්ථරාපෙත්වා. අභිනිසීදෙය්‍යාති තස්මිං අභිනිසීදති, ආපත්ති පාචිත්තියස්ස. අභිනිපජ්ජෙය්‍යාති තස්මිං අභිනිපජ්ජති, ආපත්ති පාචිත්තියස්ස.
867. අනාපුච්ඡිතෙ අනාපුච්ඡිතසඤ්ඤා සෙය්‍යං සන්ථරිත්වා වා සන්ථරාපෙත්වා වා අභිනිසීදති වා අභිනිපජ්ජති වා, ආපත්ති පාචිත්තියස්ස. අනාපුච්ඡිතෙ වෙමතිකා සෙය්‍යං සන්ථරිත්වා වා සන්ථරාපෙත්වා වා අභිනිසීදති වා අභිනිපජ්ජති වා, ආපත්ති පාචිත්තියස්ස. අනාපුච්ඡිතෙ ආපුච්ඡිතසඤ්ඤා සෙය්‍යං සන්ථරිත්වා වා සන්ථරාපෙත්වා වා අභිනිසීදති වා අභිනිපජ්ජති වා, ආපත්ති පාචිත්තියස්ස.
ආපුච්ඡිතෙ අනාපුච්ඡිතසඤ්ඤා, ආපත්ති දුක්කටස්ස. ආපුච්ඡිතෙ වෙමතිකා, ආපත්ති දුක්කටස්ස. ආපුච්ඡිතෙ ආපුච්ඡිතසඤ්ඤා, අනාපත්ති.
868. අනාපත්ති ආපුච්ඡා සෙය්‍යං සන්ථරිත්වා වා සන්ථරාපෙත්වා වා අභිනිසීදති වා අභිනිපජ්ජති වා, ගිලානාය, ආපදාසු, උම්මත්තිකාය, ආදිකම්මිකායාති.
සත්තමසික්ඛාපදං නිට්ඨිතං.