10. දන්තපොනසික්ඛාපදං
263. තෙන සමයෙන බුද්ධො භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන අඤ්ඤතරො භික්ඛු සබ්බපංසුකූලිකො සුසානෙ විහරති. සො මනුස්සෙහි දිය්‍යමානං න ඉච්ඡති පටිග්ගහෙතුං, සුසානෙපි රුක්ඛමූලෙපි උම්මාරෙපි අය්‍යවොසාටිතකානි සාමං ගහෙත්වා පරිභුඤ්ජති [භුඤ්ජති (ස්‍යා.)]. මනුස්සා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අයං භික්ඛු අම්හාකං අය්‍යවොසාටිතකානි සාමං ගහෙත්වා පරිභුඤ්ජිස්සති! ථෙරොයං භික්ඛු වඨරො මනුස්සමංසං මඤ්ඤෙ ඛාදතී’’ති! අස්සොසුං ඛො භික්ඛූ තෙසං මනුස්සානං උජ්ඣායන්තානං ඛිය්‍යන්තානං විපාචෙන්තානං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛු අදින්නං මුඛද්වාරං ආහාරං ආහරිස්සතී’’ති…පෙ… සච්චං කිර ත්වං, භික්ඛු, අදින්නං මුඛද්වාරං ආහාරං ආහරසීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, අදින්නං මුඛද්වාරං ආහාරං ආහරිස්සසි! නෙතං, මොඝපුරිස, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
‘‘යො පන භික්ඛු අදින්නං මුඛද්වාරං ආහාරං ආහරෙය්‍ය, පාචිත්තිය’’න්ති.
එවඤ්චිදං භගවතා භික්ඛූනං සික්ඛාපදං පඤ්ඤත්තං හොති.
264. තෙන ඛො පන සමයෙන භික්ඛූ උදකදන්තපොනෙ [උදකදන්තපොණෙ (ස්‍යා. ක.)] කුක්කුච්චායන්ති. භගවතො එතමත්ථං ආරොචෙසුං…පෙ… ‘‘අනුජානාමි, භික්ඛවෙ, උදකදන්තපොනං සාමං ගහෙත්වා පරිභුඤ්ජිතුං. එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
265. ‘‘යො පන භික්ඛු අදින්නං මුඛද්වාරං ආහාරං ආහරෙය්‍ය, අඤ්ඤත්‍ර උදකදන්තපොනා, පාචිත්තිය’’න්ති.
266. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.
අදින්නං නාම අප්පටිග්ගහිතකං වුච්චති.
දින්නං නාම කායෙන වා කායපටිබද්ධෙන වා නිස්සග්ගියෙන වා දෙන්තෙ හත්ථපාසෙ ඨිතො කායෙන වා කායපටිබද්ධෙන වා පටිග්ගණ්හාති, එතං දින්නං නාම.
ආහාරො නාම උදකදන්තපොනං ඨපෙත්වා යංකිඤ්චි අජ්ඣොහරණීයං, එසො ආහාරො නාම.
අඤ්ඤත්‍ර උදකදන්තපොනාති ඨපෙත්වා උදකදන්තපොනං.
‘‘ඛාදිස්සාමි භුඤ්ජිස්සාමී’’ති ගණ්හාති, ආපත්ති දුක්කටස්ස. අජ්ඣොහාරෙ අජ්ඣොහාරෙ ආපත්ති පාචිත්තියස්ස.
267. අප්පටිග්ගහිතකෙ අප්පටිග්ගහිතකසඤ්ඤී අදින්නං මුඛද්වාරං ආහාරං ආහාරෙති, අඤ්ඤත්‍ර උදකදන්තපොනා, ආපත්ති පාචිත්තියස්ස. අප්පටිග්ගහිතකෙ වෙමතිකො අදින්නං මුඛද්වාරං ආහාරං ආහාරෙති, අඤ්ඤත්‍ර උදකදන්තපොනා, ආපත්ති පාචිත්තියස්ස. අප්පටිග්ගහිතකෙ පටිග්ගහිතකසඤ්ඤී අදින්නං මුඛද්වාරං ආහාරං ආහාරෙති, අඤ්ඤත්‍ර උදකදන්තපොනා, ආපත්ති පාචිත්තියස්ස.
පටිග්ගහිතකෙ අප්පටිග්ගහිතකසඤ්ඤී, ආපත්ති දුක්කටස්ස. පටිග්ගහිතකෙ වෙමතිකො, ආපත්ති දුක්කටස්ස. පටිග්ගහිතකෙ පටිග්ගහිතකසඤ්ඤී, අනාපත්ති.
268. අනාපත්ති උදකදන්තපොනෙ, චත්තාරි මහාවිකතානි සති පච්චයෙ අසති කප්පියකාරකෙ සාමං ගහෙත්වා පරිභුඤ්ජති, උම්මත්තකස්ස, ආදිකම්මිකස්සාති.
දන්තපොනසික්ඛාපදං නිට්ඨිතං දසමං.
භොජනවග්ගො චතුත්ථො.
තස්සුද්දානං –
පිණ්ඩො ගණං පරං පූවං, ද්වෙ ච වුත්තා පවාරණා;
විකාලෙ සන්නිධී ඛීරං, දන්තපොනෙන තෙ දසාති.