3. ඛම්භකතවග්ගවණ්ණනා

604. සූපො පත්තප්පමාණවණ්ණනායං වුත්තාකාරො. ඔලොණී වුච්චති කුධිතං, ගොරසතො පූරා ථූපිතොති අත්ථො.

605. හෙට්ඨා ඔරොහතීති එත්ථ ‘‘ඔරොහනප්පමාණෙ සති එකදෙසෙ ථූපීකතෙපි අනාපත්තී’’ති වදන්ති. ‘‘පත්තස්ස පන හෙට්ඨා ච උපරි ච පදුමිනිපණ්ණාදීහි පටිච්ඡාදෙත්වා ඔදහන්තියා ලද්ධං නාම වට්ටතී’’ති ච වදන්ති. එත්ථ ‘‘යස්මා ‘සමතිත්තිකො පිණ්ඩපාතො පටිග්ගහෙතබ්බො’ති වචනං පිණ්ඩපාතො සමපුණ්ණො පටිග්ගහෙතබ්බොති දීපෙති, තස්මා අත්තනො හත්ථගතෙ පත්තෙ පිණ්ඩපාතො දිය්‍යමානො ථූපීකතොපි චෙ හොති, වට්ටතීති දීපෙති. ‘ථූපීකතං පිණ්ඩපාතං පටිග්ගණ්හාති, ආපත්ති දුක්කටස්සා’ති හි වචනං පඨමං ථූපීකතං පිණ්ඩපාතං පච්ඡා පටිග්ගණ්හතො, ආපත්තීති දීපෙති. පත්තෙන පටිග්ගණ්හතො චෙපි ථූපීකතං හොති, වට්ටති අථූපීකතස්ස පටිග්ගහිතත්තා. පයොගො පන නත්ථි අඤ්ඤත්‍ර පුබ්බදෙසා’’ති ච ‘‘සමතිත්තිකන්ති වා භාවනපුංසක’’න්ති ච වදන්ති, තස්මා විචාරෙත්වා ගහෙතබ්බං.

ඛම්භකතවග්ගවණ්ණනා නිට්ඨිතා.