4. සක්කච්චවග්ගවණ්ණනා

609. සූපොදනවිඤ්ඤත්තිසික්ඛාපදෙ ‘‘සූපො නාම ද්වෙ සූපා’’ති න වුත්තං සූපග්ගහණෙන පණීතභොජනෙහි අවසෙසානං සබ්බභොජනානං සඞ්ගණ්හනත්ථං. අනාපත්තිවාරෙ චස්ස ‘‘ඤාතකානං පවාරිතානං අඤ්ඤස්සත්ථාය අත්තනො ධනෙනා’’ති ඉදං අධිකං. කත්ථචි පොත්ථකෙ ‘‘අනාපත්ති අසඤ්චිච්ච අසතියා අජානන්තස්ස ගිලානස්ස ආපදාසූ’’ති එත්තකමෙව වුත්තං, තං න, ‘‘සමසූපකං පිණ්ඩපාතං භුඤ්ජිස්සාමී’’ති ඉමස්ස අනාපත්තිවාරෙ ‘‘අඤ්ඤස්සත්ථායා’’ති කත්ථචි ලිඛිතං, තඤ්ච පමාදවසෙන ලිඛිතං. ‘‘මුඛෙ පක්ඛිපිත්වා පුන විප්පටිසාරී හුත්වා ඔගිලිතුකාමස්සපි සහසා චෙ පවිසති, එත්ථ ‘අසඤ්චිච්චා’ති වුච්චති. විඤ්ඤත්තම්පි අවිඤ්ඤත්තම්පි එකස්මිං ඨානෙ ඨිතං සහසා අනුපධාරෙත්වා ගහෙත්වා භුඤ්ජන්තො ‘අසතියා’ති වුච්චතී’’ති ලිඛිතං, අනාපත්තිවාරෙ එකච්චෙසු පොත්ථකෙසු ‘‘රසරසෙති ලිඛිතං, තං ගහෙතබ්බ’’න්ති වුත්තං.

සක්කච්චවග්ගවණ්ණනා නිට්ඨිතා.