2. උජ්ජග්ඝිකවග්ගවණ්ණනා

586. හසනීයස්මින්ති හෙත්වත්ථෙ භුම්මං, හසිතබ්බවත්ථුකාරණාති අත්ථො. අන්තරඝරෙ උච්චාසද්දෙන අනුමොදනාදිං කරොන්තස්ස අනාපත්ති කිර. තථා හි මහින්දත්ථෙරොපි හත්ථිසාලාදීසු මහාජනස්ස කථෙසි.

591. කෙචි භික්ඛූ ‘‘පරික්ඛාරට්ඨපනමත්තෙන වාසූපගතො හොතී’’ති වදන්ති, තං තෙසං මතිමත්තමෙව. භික්ඛුනියො චෙ වාසූපගා හොන්ති, භික්ඛුනුපස්සයොව කප්පියභූමි. ‘‘යත්ථ භික්ඛුනියො එකරත්තම්පි වසන්ති, අයං භික්ඛුනුපස්සයො’’ති (පාචි. 161) වචනතො තාසං සමීපං වා තාහි ගහිතවාසාගාරං වා ‘‘ගච්ඡාමී’’ති ගච්ඡතො යථාසුඛං ගන්තුං වට්ටති. න හි තාවතා තං ඝරං අන්තරඝරසඞ්ඛ්‍යං ගච්ඡතීති නො තක්කොති ආචරියො.

උජ්ජග්ඝිකවග්ගවණ්ණනා නිට්ඨිතා.