6. පිණ්ඩචාරිකවත්තකථා

366. පිණ්ඩචාරිකවත්තෙ එවං විනිච්ඡයො වෙදිතබ්බොති යොජනා. කප්පාසං වා ගහෙත්වාති සම්බන්ධො. යඤ්චාති යඤ්ච කිඤ්චි වත්ථුං, ගහෙත්වාති සම්බන්ධො. කරොන්තී ඨිතා වාති කරොන්තී හුත්වා ඨිතා වා. තන්ති කම්මං. න ච භික්ඛාදායිකායාති ඉත්ථිලිඞ්ගවසෙන වුත්තත්තා ඉත්ථියා එව මුඛං න උල්ලොකෙතබ්බන්ති අත්ථං පටික්ඛිපන්තො ආහ ‘‘ඉත්ථී වා හොතූ’’තිආදි. ‘‘භික්ඛාදානසමයෙ’’ති ඉමිනා අඤ්ඤස්මිං සමයෙ ඔලොකෙන්තොපි නත්ථි දොසොති දස්සෙති. එකස්මිං කාලෙ භික්ඛාය දදමානාය සබ්බකාලම්පි න ඔලොකෙතබ්බන්ති අනිච්ඡිතත්ථං පටික්ඛිපති.