7. ආරඤ්ඤිකවත්තකථා

368. ආරඤ්ඤිකවත්තෙ එවං විනිච්ඡයො වෙදිතබ්බොති යොජනා. සෙනාසනා ඔතරිතබ්බන්ති එත්ථ අරඤ්ඤෙ රුක්ඛමූලාදීසු නිසින්නස්ස විහාරාභාවතො සෙනාසනං නාම වසනට්ඨානං සන්ධාය වුත්තන්ති ආහ ‘‘වසනට්ඨානතො නික්ඛමිතබ්බ’’න්ති.

පත්තං ථවිකාය පක්ඛිපිත්වාති එත්ථ කථං පත්තො ථවිකාය පක්ඛිපිතබ්බොති ආහ ‘‘සචෙ බහී’’තිආදි. තත්ථ පත්තො පක්ඛිපිතබ්බොති සම්බන්ධො. ධොවිත්වා කත්වාති පදෙසු ‘‘පත්තං වොදක’’න්ති විභත්තිපරිණාමං කත්වා සම්බන්ධිතබ්බං. තම්පීති වෙළුනාළිකම්පි. සමීපෙති ආරඤ්ඤකස්ස සෙනාසනස්ස සමීපෙ. යථා ච ආරඤ්ඤකස්ස අරණිසහිතං ඉච්ඡිතබ්බං, එවං කන්තාරං පටිපන්නස්සාපි අරණිසහිතං ඉච්ඡිතබ්බන්ති යොජනා. ගණවාසිනොති ගණෙන සහ වාසිනො, ආරඤ්ඤකස්සාති සම්බන්ධො. තෙනාති අරණිසහිතෙන. ‘‘නක්ඛත්තානෙව නක්ඛත්තපදානී’’ති ඉමිනා අස්සයුජාදිනක්ඛත්තානෙව (අභිධානප්පදීපිකායං 58-60 ගාථාසු) දිසාභාගජානනස්ස, ච සමයජානනස්ස ච කාරණත්තා නක්ඛත්තපදානි නාමාති දස්සෙති.