7. නිසීදනසික්ඛාපදං

531. සත්තමෙ කත්ථාති කිස්මිං ඛන්ධකෙ, කිස්මිං වත්ථුස්මිං වා. හීති සච්චං. තත්ථාති චීවරක්ඛන්ධකෙ, පණීතභොජනවත්ථුස්මිං වා. ‘‘යථා නාමා’’ති ඉමිනා ‘‘සෙය්‍යථාපී’’ති පදස්ස අත්ථං දස්සෙති, ‘‘පුරාණො චම්මකාරො’’ති ඉමිනා ‘‘පුරාණාසිකොට්ඨො’’ති පදස්ස. චම්මකාරො හි අසිනා චම්මං කුටති ඡින්දතීති ‘‘අසිකොට්ඨො’’ති වුච්චති. වත්ථුප්පන්නකාලමුපනිධාය වුත්තං ‘‘පුරාණො’’ති. තමෙවූපමං පාකටං කරොන්තො ආහ ‘‘යථා හී’’ති. හීති තප්පාකටීකරණං, තං පාකටං කරිස්සාමීති හි අත්ථො. චම්මකාරො කඩ්ඪතීති සම්බන්ධො. විත්ථතන්ති විසාලං. සොපීති උදායීපි. තං නිසීදනං කඩ්ඪතීති යොජනා. තෙනාති කඩ්ඪනහෙතුනා. තන්ති උදායිං. සන්ථතසදිසන්ති සන්ථතෙන සදිසං. එකස්මිං අන්තෙති එකස්මිං කොට්ඨාසෙ, ඵාලෙත්වාති සම්බන්ධොති. සත්තමං.