10. උය්‍යොධිකසික්ඛාපදං

322. දසමෙ යුජ්ඣන්තීති සංපහරන්ති. ‘‘බලස්ස අග්ගං එත්ථා’’තිඉමිනා භින්නාධිකරණබාහිරත්ථසමාසං දස්සෙති. ‘‘ජානන්තී’’තිපදං අත්ථසම්පුණ්ණත්ථාය පක්ඛිත්තං. අග්ගන්ති කොට්ඨාසං. බලං ගණීයති එත්ථාති බලග්ගන්ති වචනත්ථොපි යුජ්ජති. තෙනාහ ‘‘බලගණනට්ඨාන’’න්ති. ඉදඤ්හි වචනං අම්බසෙචනගරුසිනනයෙන වුත්තං. කථං? ‘‘බලගණනට්ඨාන’’න්ති වදන්තෙන අට්ඨකථාචරියෙන ‘‘බලස්ස අග්ගං ජානන්ති එත්ථාති බලග්ග’’න්ති වචනත්ථස්ස පිණ්ඩත්ථො ච ඤාපීයති, ‘‘බලං ගණීයති එත්ථාති බලග්ග’’න්ති වචනත්ථො ච දස්සීයති. වියූහීයතෙ සම්පිණ්ඩීයතෙ බ්‍යූහො, සෙනාය බ්‍යූහො සෙනාබ්‍යූහොති අත්ථං දස්සෙති ‘‘සෙනාය වියූහ’’න්තිආදිනා. අණති භෙරවසද්දං කරොතීති අණීකං, මුද්ධජණකාරො, හත්ථීයෙව අණීකං හත්ථාණීකං. එසෙව නයො සෙසෙසුපි. යො හත්ථී පුබ්බෙ වුත්තො, තෙන හත්ථිනාති යොජනාති. දසමං.

අචෙලකවග්ගො පඤ්චමො.