26. සමානාසනිකනිද්දෙසවණ්ණනා

195. තිවස්සන්තරමෙකමාසනං භික්ඛූනං අනුඤ්ඤාතන්ති සම්බන්ධො. තත්ථ එකස්මිං ආසනෙ මඤ්චාදිකෙ ද්වින්නං ආසනං නිසීදනං එකමාසනං. ම-කාරො සන්ධිජො. කීදිසන්ති ආහ ‘‘තිවස්සන්තර’’න්ති. තිණ්ණං වස්සානමන්තරමෙතස්සාති තිවස්සන්තරො, ද්වීහි වස්සෙහි මහන්තතරො වා දහරතරො වා භික්ඛු, සො අස්ස අත්ථීති තිවස්සන්තරං, තිවස්සන්තරවන්තන්ති අත්ථො. යො පන එකෙන වස්සෙන මහන්තතරො වා දහරතරො වා එකවස්සොයෙව වා, තබ්බන්තතාය වත්තබ්බමෙව නත්ථි. අථ වා තිවස්සන්තරන්ති කරණත්ථෙ උපයොගවචනං, තිවස්සන්තරෙන සද්ධින්ති අත්ථො. තමෙව සමත්ථෙති ‘‘සත්තවස්සෙ’’ච්චාදිනා.

196. මුනි අනුඤ්ඤාසීති සම්බන්ධො. සබ්බෙහෙවාති සමානාසනිකඅසමානාසනිකෙහි සබ්බෙහෙව සද්ධිං.

197. දීඝාසනං දස්සෙති ‘‘අන්ත’’න්තිආදිනා. යං තිණ්ණං නිසීදිතුං පහොති, තං අන්තං දීඝාසනන්ති සම්බන්ධො. අන්තන්ති පච්ඡිමං. අදීඝාසනෙ පන සමානාසනිකා නිසීදිතුං ලබ්භන්තීති දස්සෙන්තො ‘‘මඤ්චකෙ’’තිආදිමාහ. සබ්බත්ථ අයථාකරණතො දුක්කටන්ති.

සමානාසනිකනිද්දෙසවණ්ණනා නිට්ඨිතා.