27. අසංවාසනිද්දෙසවණ්ණනා

198. උක්ඛිත්තොති කම්මනානාසංවාසකසඞ්ඛාතො ආපත්තියා අදස්සනෙ, අප්පටිකම්මෙ, පාපිකාය දිට්ඨියා අප්පටිනිස්සග්ගෙ උක්ඛිත්තකො. අනුපසම්පන්නොති සික්ඛමානසාමණෙරසාමණෙරිසික්ඛාපච්චක්ඛාතසඞ්ඛාතො අනුපසම්පන්නො. ඡින්නමූලකොති අන්තිමවත්ථුඅජ්ඣාපන්නො. උක්ඛිත්තකෙසු ‘‘ධම්මවාදිනො එතෙ’’ති උප්පන්නාය ලද්ධියා නානාභූතො සංවාසො එතස්සාති නානාසංවාසො, උක්ඛිත්තානුවත්තකසඞ්ඛාතො ලද්ධිනානාසංවාසකො. සීමතො නිග්ගතා නිස්සීමා, සීමන්තරිකා බහිසීමා ච, තත්ථ හත්ථපාසෙ චෙපි ඨිතො, සීමානානාසංවාසකො නිස්සීමට්ඨිතො. වෙහායසෙ ආකාසෙ ඨිතො වෙහායසණ්ඨිතො බින්දාගමෙන. තත්ථ ‘‘නානාසංවාසො චා’’තිආදිනා සමාහාරද්වන්දෙපි ක්වචි නපුංසකලිඞ්ගං බ්‍යභිචරතීති නපුංසකත්තාභාවො යථා ‘‘මග්ගාමග්ගො’’ති. එකකම්මං එකුද්දෙසො සමසික්ඛතාති අයං තිවිධොපි සංවාසො නාම. සො යෙසං නත්ථි, තෙ අසංවාසා. එතෙ හත්ථපාසතො බහිකරණවසෙන වජ්ජෙතබ්බා. එතෙසු හි තිවිධෙ උක්ඛිත්තකෙ සති උපොසථාදිකං කම්මං කරොන්තස්ස පාචිත්තියං, ඉතරෙසු දුක්කටන්ති.

අසංවාසනිද්දෙසවණ්ණනා නිට්ඨිතා.