24. අඤ්ජනීනිද්දෙසවණ්ණනා

182. වට්ටා වා අට්ඨසොළසංසා වා මට්ඨා අඤ්ජනී වට්ටතීති යොජනා. අට්ඨ ච සොළස ච අංසා කොණා යස්සා සාති විග්ගහො. සොළසංසපදෙසවිභත්තාය අට්ඨංසාසුතියා අට්ඨංසපදෙසවිභත්තා චතුරංසාපි සාමත්ථියා ගය්හතීති ඤාතබ්බං. ‘‘උජුකමෙව පන චතුරංසාවා’’ති හි අට්ඨකථායං (පාරා. අට්ඨ. 1.85) වුත්තං. අඤ්ජනීති අඤ්ජනනාළි. මූලෙ තිස්සොපි ලෙඛා වට්ටන්තීති යොජනා. මූලෙති බුන්දෙ, හෙට්ඨතොති වුත්තං හොති. ලෙඛාති වට්ටලෙඛා. බන්ධිතුං ගීවායං එකා එව ලෙඛා වට්ටතීති සම්බන්ධො. බන්ධිතුන්ති පිධානබන්ධනත්ථං.

183. යං කිඤ්චි රූපන්ති ඉත්ථිරූපාදි යං කිඤ්චි රූපං. මාලාදිකම්මන්ති මාලාකම්මං ලතාකම්මං. අඩ්ඪචන්දාදීති එත්ථ ආදි-සද්දෙන අග්ඝියාදිකං ගහිතං. එත්ථාති අඤ්ජනියං.

184. ථවිකාති අඤ්ජනිථවිකා. සිපාටීති ඛුරසිපාටිකා. සලාකාපි අචිත්තකා ලබ්භාති සම්බන්ධො. සලාකාති අඤ්ජනිසලාකා. නත්ථි චිත්තමෙතිස්සාති අචිත්තකා. තාදිසං පන ලභිත්වා උපාහනායො විය නාසෙත්වා පරිභුඤ්ජිතබ්බං.

185. අට්ඨි-සද්දෙන මනුස්සට්ඨිං ඨපෙත්වා යං කිඤ්චි අට්ඨි ගහිතං.

186. ධූමනෙත්තාති ධූමනාළිකා, නිස්ස ආ-කාරාදෙසවසෙන වුත්තං. සත්ථකදණ්ඩානීති සත්ථදණ්ඩා. නත්ථුං දෙන්ති එතායාති නත්ථුදානා. අනියමෙන හි නදාදිතො වා ඊ. තෙහි සඞ්ඛනාභිආදීහි නිබ්බත්තා තම්මයා.

අඤ්ජනීනිද්දෙසවණ්ණනා නිට්ඨිතා.