23. අනොලොකියනිද්දෙසවණ්ණනා

181. සාරත්තොති සංරත්තො, සඤ්ජාතරාගචිත්තොති අත්ථො. ඉත්ථියාති තදහුජාතායපි පටසතනිවත්ථාය අනොකාසුපනිජ්ඣායනෙ අන්තමසො තිරච්ඡානගතානම්පි දුක්කටමෙව. භික්ඛාදායියාති උපලක්ඛණමත්තං, ඉත්ථී වා හොතු පුරිසො වා, භික්ඛාදානසමයෙ අසාරත්තෙනාපි මුඛං න උල්ලොකෙතබ්බං. උජ්ඣානං ලාමකතො සංචින්තනං, කොපො, තත්ථ සඤ්ඤා අස්සාති උජ්ඣානසඤ්ඤී. ඉධ පන ගිලානොපි න මුච්චති. ආදාසෙ උදකපත්තෙති ඉමිනා සෙසෙසු කංසපත්තාදීසු කඤ්ජියාදීසු ච මුඛනිමිත්තං පඤ්ඤායති, තෙසං සඞ්ගහො. ‘‘සඤ්ඡවි නු ඛො මෙ වණ්ණො, නො, ජිණ්ණො නු ඛොම්හි, නො’’ති පන ඔලොකෙතුං වට්ටති. අස්සාති භික්ඛුනො.

අනොලොකියනිද්දෙසවණ්ණනා නිට්ඨිතා.