19. න්හානකප්පනිද්දෙසවණ්ණනා

168. කප්පනං කප්පියතා කප්පො, න්හානෙ කප්පො න්හානකප්පො. නවකො ථෙරානං පුරතො උපරි වා න ච න්හායෙය්‍යාති සම්බන්ධො. න චාති නයෙව. පුරතොති අභිමුඛෙ. උපරීති නදියා උපරි.

169-171. කුට්ටත්ථම්භතරුට්ටානෙ කායං න ඝංසයෙති සම්බන්ධො. තත්ථ කුට්ටං නාම ඉට්ඨකදාරුසිලාභිත්ති. ථම්භො නාම නහානතිත්ථෙ නිඛනිත්වා ඨපිතො. තරූති රුක්ඛො. අට්ටානං නාම තච්ඡෙත්වා අට්ඨපදාකාරෙන රාජියො ඡින්දිත්වා නහානතිත්ථෙ නිඛාතඵලකං. ගන්ධබ්බහත්ථෙන වා…පෙ… මල්ලකෙන වා කායං සරීරෙන වා අඤ්ඤමඤ්ඤං න ඝංසයෙති සම්බන්ධො. ගන්ධබ්බහත්ථෙනාති දාරුමයහත්ථෙන. කුරුවින්දකසුත්තියාති කුරුවින්දකපාසාණචුණ්ණානි ලාඛාය බන්ධිත්වා කතගුළිකාවලියා සුත්තෙන ආවුණිතසුත්තියා. මල්ලකෙනාති මකරදන්තකෙ ඡින්දිත්වා පදුමකණ්ණිකසණ්ඨානෙන කතමල්ලකෙන. සරීරෙනාති අත්තනො කායෙන. අඤ්ඤමඤ්ඤස්ස අඤ්ඤමඤ්ඤං කිරියාකරණසඞ්ඛාතෙ කිරියාබ්‍යභිහාරෙ ද්විත්තං. කපාල…පෙ… පුථුපාණි ච සබ්බෙසං වට්ටතීති සම්බන්ධො. කපාලඤ්ච ඉට්ඨකා ච, තාසං ඛණ්ඩානි. පුථුපාණීති පුථු නානා පාණි පුථුපාණි, හත්ථපරිකම්මං රුළ්හීවසෙන. සබ්බෙසන්ති ගිලානාගිලානානං. ගිලානස්ස අකතමල්ලකං වට්ටතීති සම්බන්ධො. අකතමල්ලකං නාම කතමල්ලකවිපරීතං. ඵෙණං නාම සමුද්දඵෙණන්ති.

න්හානකප්පනිද්දෙසවණ්ණනා නිට්ඨිතා.