18. නග්ගනිද්දෙසවණ්ණනා

166. ‘‘වජෙ’’තිආදීසු න-සද්දො සම්බන්ධිතබ්බො. තත්ථ පන යථානුරූපභොජනාදිකං කම්මවචනං අජ්ඣාහරිත්වා ‘‘භොජනං න භුඤ්ජෙ’’තිආදිනා අත්ථො වෙදිතබ්බො.

167. න කරෙති හත්ථකම්මාදිකං පරිකම්මං සයම්පි න කරෙය්‍යාති අත්ථො. පටිච්ඡාදීසූති නිද්ධාරණෙ භුම්මං, ජන්තාඝරුදකවත්ථප්පටිච්ඡාදීනං මජ්ඣෙති අත්ථො. පරිකම්මෙ දුවෙ කප්පියාති සම්බන්ධො. පරිකම්මෙති ජන්තාඝරෙ උදකෙපි උපජ්ඣායාදීනං කත්තබ්බපරිකම්මවිසයෙ, න අභිවාදනාදීසු. දුවෙති ජන්තාඝරඋදකප්පටිච්ඡාදයො. ඡාදෙන්ති එතායාති ඡාදි, වත්ථස්ස ඡාදි වත්ථච්ඡාදි. සබ්බත්ථාති සබ්බකම්මෙසූති.

නග්ගනිද්දෙසවණ්ණනා නිට්ඨිතා.