10. අකප්පියමංසනිද්දෙසවණ්ණනා

113-4. මනුස්සහත්ථිඅස්සානඤ්ච …පෙ… උරගස්ස ච යං මංසඤ්ච, යං උද්දිස්සකතමංසඤ්ච, අප්පටිවෙක්ඛිතං යඤ්ච මංසං, තෙසු මංසෙසූති එවං යොජෙත්වා අත්ථො වෙදිතබ්බො. තත්ථ සීසගීවාතරඞ්ගෙන චරන්තා අච්ඡවිසෙසාව තරච්ඡා. උරගස්සාති ඉමිනා සබ්බාපි දීඝජාති සඞ්ගහිතා. උද්දිස්සකතමංසන්ති භික්ඛුං උද්දිසිත්වා කතං උද්දිස්සකතං, තඤ්ච තං මංසඤ්ච. එත්ථ ච මංස-ග්ගහණෙන මච්ඡානම්පි ගහණං වෙදිතබ්බං උපලක්ඛණවසෙන, ච-සද්දෙන වා. පඤ්චසුපි සහධම්මිකෙසු යං කිඤ්චි උද්දිස්සකතං සබ්බෙසම්පි න කප්පති, තම්පි අදිට්ඨඅසුතඅපරිසඞ්කිතතාය තිකොටිපරිසුද්ධං වට්ටති. අප්පටිවෙක්ඛිතන්ති අනුපපරික්ඛිතං, අනාපුච්ඡිතන්ති අත්ථො. ආපත්තිභීරුකෙන හි රූපං සල්ලක්ඛෙන්තෙනාපි පුච්ඡිත්වා පටිග්ගහෙතබ්බං පරිභුඤ්ජිතබ්බඤ්ච. මනුස්සානං මංසෙසු ථුල්ලච්චයන්ති යොජනා. ථූලො අච්චයො එත්ථාති රස්සෙ, ද්විත්තෙ ච ථුල්ලච්චයං. පාරාජිකසඞ්ඝාදිසෙසෙහි ඨපෙත්වා ඉතො අධිකං වජ්ජං නත්ථි. සෙසෙසූති අවසෙසෙසු එකාදසසු.

115. ඉදානි මනුස්සාදීනං අට්ඨිආදීනිපි අකප්පියානීති දස්සෙතුං ‘‘අට්ඨිපී’’තිආදිමාහ. පි-සද්දො ‘‘ලොහිත’’න්තිආදීසුපි අනුවත්තෙතබ්බො. එසන්ති මනුස්සාදීනං දසන්නං. වසාසු පන එකා මනුස්සවසා න වට්ටති. ඛීරාදීසු අකප්පියං නාම නත්ථි. උද්දිස්සකතංයෙව සචිත්තකන්ති යොජනා. සචිත්තකන්ති උද්දිස්සකතභාවජානනචිත්තෙන සහ වත්තතීති සචිත්තකං. වත්ථුවීතික්කමවිජානනචිත්තෙන හි සචිත්තකත්තං. එත්ථ ච සචිත්තකත්තං ආපත්තියා එව, න ච මංසස්ස, තථාපි මංසසීසෙන ආපත්ති එව වුත්තාති විඤ්ඤාතබ්බන්ති.

අකප්පියමංසනිද්දෙසවණ්ණනා නිට්ඨිතා.