4. රජනනිද්දෙසවණ්ණනා

58. ඉදානි තෙසං චීවරානං රජනවිධානං දස්සෙතුං ‘‘රජනානි චා’’ති වුත්තං. තත්ථ ‘‘අනුජානාමි, භික්ඛවෙ, ඡ රජනානි මූලරජනං ඛන්ධරජනං තචරජනං පත්තරජනං පුප්ඵරජනං ඵලරජන’’න්ති (මහාව. 344) එවං භගවතා අනුඤ්ඤාතත්තා ‘‘ඡප්පකාරානි අනුඤ්ඤාතානි සත්ථුනා’’ති වුත්තං.

59. තත්ථ මූලෙති මූලරජනෙති අත්ථො. හලිද්දිං විවජ්ජිය සබ්බං ලබ්භන්ති සම්බන්ධො. එවං සෙසෙසුපි. තුඞ්ගහාරකො නාම එකො සකණ්ටකරුක්ඛො, තස්ස හරිතාලවණ්ණං ඛන්ධරජනං හොති. ගිහිපරිභුත්තං පන අල්ලිපත්තෙන එකවාරං රජිතුං වට්ටති. ඵලරජනෙ අකප්පියං නාම නත්ථි, සබ්බං වට්ටතීති. රජනවිනිච්ඡයො.

රජනනිද්දෙසවණ්ණනා නිට්ඨිතා.