33. කායබන්ධනනිද්දෙසවණ්ණනා

235. අකායබන්ධනොති කායබන්ධනං අබන්ධිත්වාති අත්ථො. තතො පට්ඨාය චීවරං පාරුපිතබ්බං, තතො පට්ඨාය එව කායබන්ධනං බන්ධිතබ්බං. ‘‘න භික්ඛවෙ අකායබන්ධනෙන ගාමො පවිසිතබ්බො. යො පවිසෙය්‍ය, ආපත්ති දුක්කටස්සා’’ති (චූළව. 278) හි වුත්තං. තත්ථෙවාසතියා ගතොති අසතියා ගතො යත්ථ සරති, තත්ථෙව බන්ධිතබ්බං. සරිත්වා පන යාව න බන්ධති, තාව පිණ්ඩාය චරිතුං න වට්ටති. යදි අන්තොගාමෙ සරති, කායබන්ධනෙ සති එකමන්තෙ ඨත්වා බන්ධිතබ්බං, අසති චෙ නික්ඛමිත්වා බන්ධිත්වා පුන පිණ්ඩාය පවිසිතබ්බන්ති වදන්ති.

236. ‘‘අනුජානාමි, භික්ඛවෙ, ද්වෙ කායබන්ධනානි පට්ටිකං සූකරන්තක’’න්ති (චූළව. 278) වුත්තත්තා ‘‘දුවිධ’’න්ති වුත්තං. තත්ථ සූකරන්තං නාම කුඤ්චිකාකොසකා විය අන්තෙ සුසිරං කත්වා කොට්ටිතං. රජ්ජු ච එකාති එකවට්ටා රජ්ජු ච. තදනුලොමිකාති තෙසං ද්වින්නං අනුලොමිකා.

237. මච්ඡකණ්ඩකඛජ්ජුරී-පත්තා මට්ඨා ච පට්ටිකාති එත්ථ (චූළව. අට්ඨ. 278) එතෙ මච්ඡකණ්ටකාදයො මට්ඨා විකාරරහිතා පට්ටිකා ච තදන්තොගධාති අධිප්පායො. ලබ්භා දසා චතස්සොති එකාය වා ද්වීසු වා තීසු වා කථා එව නත්ථීති අධිප්පායො, තතො පරං න වට්ටති. අන්තෙසූති උභොසු අන්තෙසු. ගුණසුත්තකන්ති දිගුණසුත්තකං.

239. මකරමුඛාදින්ති ආදි-සද්දෙන දෙඩ්ඩුභසීසං ගහිතං. උභන්තෙති උභොසු අන්තෙසු. කස්සාති? විධස්ස. ඝටකාති ඝටකතො. ලෙඛාති ලෙඛාය. ඝටකතො ච ලෙඛාය ච අඤ්ඤං චිත්තකං න කප්පතීති අත්ථො.

240. දෙඩ්ඩුභකන්ති (චූළව. 278; චූළව. අට්ඨ. 278) උදකසප්පසිරසදිසං. මුරජන්ති බහුරජ්ජුකෙ එකතො සඞ්කඩ්ඪිත්වා එකාය රජ්ජුයා පලිවෙඨෙත්වා කතරජ්ජු. මද්දවීණන්ති පාමඞ්ගසදිසං. කලාබුකන්ති අනෙකවට්ටං. එතානි පන සබ්බානි න කප්පන්ති. දසාසු ද්වෙ මජ්ඣිමාති මුරජං මද්දවීණන්ති ද්වෙ මජ්ඣිමා එව. කප්පරෙති කප්පන්තීති අත්ථො.

241. ගණ්ඨියො චාපීති (චූළව. 279) චීවරගණ්ඨියොපි. වෙළුආදිමයා කප්පන්තීති පසඞ්ගෙන වුත්තං. කායබන්ධනවිනිච්ඡයො.

කායබන්ධනනිද්දෙසවණ්ණනා නිට්ඨිතා.

පඨමභාණවාරං.