27. අසංවාසිකනිද්දෙසවණ්ණනා
198. උක්ඛිත්තොති ආපත්තියා අදස්සනෙ, අප්පටිකම්මෙ, පාපිකාය දිට්ඨියා අප්පටිනිස්සග්ගෙ වා උක්ඛිත්තකොති තිවිධොපි ඉධ උක්ඛිත්තො ගහිතො. අනුපසම්පන්නොති ඉමිනා සික්ඛමානසාමණෙරසාමණෙරීසික්ඛාපච්චක්ඛාතකා ගහිතාති වෙදිතබ්බා. ඡින්නමූලකො නාම අන්තිමවත්ථුං අජ්ඣාපන්නකො. නානාසංවාසොති ලද්ධිනානාසංවාසකො. ‘‘නානාසීමාය ඨිතචතුත්ථො කම්මං කරෙය්‍ය, ඉද්ධියා වෙහාසෙ ඨිතචතුත්ථො කම්මං කරෙය්‍ය, අකම්මං න ච කරණීය’’න්ති හි වුත්තත්තා ඉමෙපි ‘‘අසංවාසිකා’’ති වුත්තා. එතෙසු පන උක්ඛිත්තකෙහි සද්ධිං උපොසථාදීනි කරොන්තො පාචිත්තියං ආපජ්ජති. නිස්සීමට්ඨවෙහාසට්ඨෙහි කරොන්තස්ස කම්මං කුප්පති, දුක්කටඤ්ච හොති, ඉතරෙහි දුක්කටං. අසංවාසිකවිනිච්ඡයො.
අසංවාසිකනිද්දෙසවණ්ණනා නිට්ඨිතා.