24. අඤ්ජනීනිද්දෙසවණ්ණනා

182. වට්ටා වා අට්ඨසොළසංසා වා මට්ඨා පුප්ඵලතාදීහි අචිත්තකා අඤ්ජනී වට්ටතීති අත්ථො. තිස්සොපි වට්ටන්ති, එකාය වා ද්වීසු වා කථා එව නත්ථීති අධිප්පායො. ලෙඛාති වට්ටලෙඛා. බන්ධිතුන්ති පිධානකබන්ධනත්ථං.

183. රූපන්ති සකුණරූපාදි. යදි ච එදිසං අඤ්ඤෙහි කතං ලභති, ඝංසිත්වා වා ඡින්දිත්වා වා යථා වා න පඤ්ඤායති, තථා සුත්තෙන වෙඨෙත්වා වළඤ්ජෙතබ්බං.

184. ථවිකාති අඤ්ජනිථවිකා. අඤ්ජනිසලාකාපි ලබ්භතීති සම්බන්ධො.

185-6. අට්ඨීති (මහාව. 266; මහාව. අට්ඨ. 264) මනුස්සට්ඨිං ඨපෙත්වා අවසෙසට්ඨි. විසාණදන්තෙසු අකප්පියං නාම නත්ථි. ආමලකකක්කාදීහි කතා ඵලමයා. තම්මයාති ඉධ වුත්තෙහෙව නිබ්බත්තා. අඤ්ජනීවිනිච්ඡයො.

අඤ්ජනීනිද්දෙසවණ්ණනා නිට්ඨිතා.