21. චම්මනිද්දෙසවණ්ණනා

173. ඉදානි ‘‘අනුජානාමි, භික්ඛවෙ, සබ්බපච්චන්තිමෙසු ජනපදෙසු චම්මානි අත්ථරණානි එළකචම්මං අජචම්මං මිගචම්ම’’න්ති (මහාව. 259) එවං වුත්තචම්මානි දස්සෙතුං ‘‘මිගාජෙළකචම්මානී’’තිආදිමාහ. පරිභුඤ්ජිතුන්ති (මහාව. අට්ඨ. 262) මඤ්චාදීසු යත්ථ කත්ථචි අත්ථරිත්වා නිපජ්ජිතුං වා නිසීදිතුං වා වට්ටන්තීති අත්ථො. රොහිතෙණීපසදා ච කුරුඞ්ගා ච ච-සද්දෙන අඤ්ඤෙපි වාළමිගා මිගමාතුකාදයොපි මිගජාතිකා එවාති අධිප්පායො.

174. අනුඤ්ඤාතත්තයා අඤ්ඤන්ති –

‘‘මක්කටො කාළසීහො ච, සරභො කදලීමිගො;

යෙ ච වාළමිගා කෙචි, තෙසං චම්මං න වට්ටතී’’ති. –

එත්ථ වාළමිගග්ගහණෙන වුත්තාවසෙසා අන්තමසො ගොමහිංසාදයො ගහිතාති වෙදිතබ්බා. ථවිකාති උපාහනකොසකසත්ථකොසකකුඤ්චිකකොසකාති වෙදිතබ්බා, න පත්තත්ථවිකාදයො. චම්මවිනිච්ඡයො.

චම්මනිද්දෙසවණ්ණනා නිට්ඨිතා.