17. ආපුච්ඡකරණනිද්දෙසවණ්ණනා
161. ථෙරෙනාති සඞ්ඝත්ථෙරෙන.
162. තත්ථ තත්ථ සන්නිපතිතානං සබ්බෙසං වුඩ්ඪො වුඩ්ඪතරො, තස්මිං වුඩ්ඪතරාගමෙ පුන ආපුච්ඡනං නත්ථි. භත්තග්ගෙ චානුමොදතොති එත්ථ දානපතිනා යාචිතෙන දහරෙන වුඩ්ඪෙන අනාපුච්ඡිත්වා කථෙතුං වට්ටතීති වදන්ති.
163. එකවිහාරකෙති එකොවරකෙ වුඩ්ඪෙන වසන්තො අනාපුච්ඡා න සජ්ඣායෙය්‍යාති අත්ථො. උද්දෙසං පරිපුච්ඡඤ්ච නො දදෙති උද්දෙසං වා පරිපුච්ඡං වා නො දදෙය්‍ය.
164. න විවරෙය්‍ය න ථකෙය්‍ය චාති සම්බන්ධො. ද්වාරං නාම මහාවළඤ්ජං, තත්ථ ආපුච්ඡනකිච්චං නත්ථි.
165. වුඩ්ඪෙන චඞ්කමෙ චඞ්කමන්තොපි යෙන වුඩ්ඪො, තෙන පරිවත්තයෙති සම්බන්ධො. ආපුච්ඡකරණවිනිච්ඡයො.
ආපුච්ඡකරණනිද්දෙසවණ්ණනා නිට්ඨිතා.