18. නග්ගනිද්දෙසවණ්ණනා

166. ‘‘න ත්වෙව නග්ගෙන ආගන්තබ්බං, යො ආගච්ඡෙය්‍ය, ආපත්ති දුක්කටස්සා’’ති (පාරා. 517) වුත්තත්තා (චූළව. 261;) ‘‘නග්ගො මග්ගං න වජෙ’’ති වුත්තං.

167. පටිච්ඡාදිසූති ‘‘තෙන ඛො පන සමයෙන භික්ඛූ ජන්තාඝරෙපි උදකෙපි පරිකම්මං කාතුං කුක්කුච්චායන්ති. අනුජානාමි, භික්ඛවෙ, තිස්සො පටිච්ඡාදියො ජන්තාඝරප්පටිච්ඡාදිං උදකප්පටිච්ඡාදිං වත්ථප්පටිච්ඡාදි’’න්ති එවං වුත්තාසු තීසු පටිච්ඡාදීසූති අත්ථො. දුවෙති එතාසු තීසු පටිච්ඡාදීසු උදකජන්තාඝරප්පටිච්ඡාදියො පරිකම්මෙ කප්පන්තීති අධිප්පායො. වත්ථච්ඡාදීති වත්ථප්පටිච්ඡාදි. සබ්බත්ථාති ඛාදනීයසායනීයාදීසු සබ්බකම්මෙසු කප්පියාති අත්ථො. නග්ගවිනිච්ඡයො.

නග්ගනිද්දෙසවණ්ණනා නිට්ඨිතා.