10. අකප්පියමංසනිද්දෙසවණ්ණනා

113. ඉදානි මංසෙසු පටිපජ්ජිතබ්බාකාරං දස්සෙතුං ‘‘මංසෙසු ච අකප්පිය’’න්ති උද්ධටං. අකප්පියමංසම්හි දස්සිතෙ කප්පියමංසං දස්සිතමෙව හොති පාරිසෙසනයෙන. උරගස්ස චාති එත්ථ සබ්බොපි උරගො න කප්පති.

114. එත්තාවතා ජාතිවසෙන දසවිධම්පි අකප්පියමංසං දස්සෙත්වා ඉදානි කප්පියමංසෙසුපි අකප්පියවිධිං දස්සෙතුං ‘‘උද්දිස්සකතමංසඤ්ච, යඤ්ච අප්පටිවෙක්ඛිත’’න්ති වුත්තං. තත්ථ පඤ්චසු සහධම්මිකෙසු යස්ස කස්සචි යං කිඤ්චි උද්දිස්ස කතං උද්දිස්සකතං නාම, තං පන ජානිත්වා පරිභුඤ්ජිතුං සබ්බෙසම්පි න වට්ටති, අජානන්තානං අනාපත්ති. මච්ඡෙසුපි එසෙව නයො. අප්පටිවෙක්ඛිතන්ති අනුපපරික්ඛිතං, අනාපුච්ඡිතන්ති අත්ථො. ‘‘න භික්ඛවෙ අප්පටිවෙක්ඛිත්වා මංසං පරිභුඤ්ජිතබ්බං, යො පරිභුඤ්ජෙය්‍ය, ආපත්ති දුක්කටස්සා’’ති (මහාව. 281) වුත්තං. මච්ඡෙසු පන ආපුච්ඡනකිච්චං නත්ථි අකප්පියමච්ඡානං නත්ථිතායාති වදන්ති. ඉදානි එතෙසු ආපත්තිභෙදං දස්සෙතුං ‘‘ථුල්ලච්චය’’න්තිආදිමාහ. තං සබ්බං (කඞ්ඛා. අට්ඨ. සන්නිධිකාරකසික්ඛාපදවණ්ණනා) උත්තානමෙව.

115. ඉදානි න කෙවලං ඉමෙසං මනුස්සාදීනං මංසමෙව අකප්පියං, අට්ඨිආදීනිපි අකප්පියානීති දස්සෙතුං ‘‘අට්ඨීපී’’තිආදි වුත්තං. තත්ථ (මහාව. අට්ඨ 281) ලොමම්පෙසන්ති ලොමම්පි එසං අකප්පියමංසවත්ථූනන්ති අත්ථො. සචිත්තකං වාති එතෙසු පන උද්දිස්සකතමෙව සචිත්තකං, සෙසා අචිත්තකාති. අකප්පියමංසවිනිච්ඡයො.

අකප්පියමංසනිද්දෙසවණ්ණනා නිට්ඨිතා.