8. උපස්සුතිසික්ඛාපදවණ්ණනා

සුය්‍යතීති සුති, සද්දො, සුතියා සමීපං උපස්සුතීති ආහ ‘‘සුතිසමීප’’න්ති, සද්දසමීපන්ති අත්ථො. යත්ථ පන ඨිතෙන සක්කා හොති සද්දං සොතුං, තත්ථ තිට්ඨන්තො සද්දසමීපෙ තිට්ඨති නාමාති ආහ ‘‘යත්ථ ඨත්වා’’තිආදි. අථ වා උපෙච්ච සුය්‍යති එත්ථාති උපස්සුති, ඨානං, යං ඨානං උපගතෙන සක්කා හොති කථෙන්තානං සද්දං සොතුං, තත්ථාති එවම්පෙත්ථ අත්ථො දට්ඨබ්බො. තුරිතගමනෙපීති පච්ඡතො ගච්ඡන්තස්ස පුරතො ගච්ඡන්තානං සද්දසවනත්ථං සීඝගමනෙපි. ඔහීයමානෙපීති පුරතො ගච්ඡන්තස්ස පච්ඡතො ගච්ඡන්තානං වචනසවනත්ථං ඔහීයමානෙපි.

වූපසමිස්සාමීති උපසමං ගමිස්සාමි, කලහං න කරිස්සාමි. අත්තානං පරිමොචෙස්සාමීති මම අකාරකභාවං කථෙත්වා අත්තානං පරිමොචෙස්සාමි. සියා කිරියන්ති කදාචි සොතුකාමතාය ගමනවසෙන සමුට්ඨානතො සියා කිරියං. සියා අකිරියන්ති කදාචි ඨිතට්ඨානං ආගන්ත්වා මන්තයමානානං අජානාපනවසෙන සමුට්ඨානතො සියා අකිරියං.

උපස්සුතිසික්ඛාපදවණ්ණනා නිට්ඨිතා.