3. මොහනසික්ඛාපදවණ්ණනා

තස්මිං අනාචාරෙති තස්මිං අනාචාරෙ ආචිණ්ණෙ. මොක්ඛො නත්ථීති තස්සා ආපත්තියා මොක්ඛො නත්ථි. තස්ස තෙති තස්ස තව. අලාභාති යෙ අඤ්ඤෙසං පාතිමොක්ඛෙ උද්දිස්සමානෙ සාධුකං අට්ඨිං කත්වා මනසිකරණස්ස ආනිසංසසඤ්ඤිතා දිට්ඨධම්මිකසම්පරායිකා ච ලාභා ඉච්ඡිතබ්බා, තෙ සබ්බෙ තුය්හං අලාභා එව හොන්ති. දුල්ලද්ධන්ති පුඤ්ඤවිසෙසෙන ලද්ධම්පි මනුස්සත්තං දුල්ලද්ධං. සාධුකන්ති සුට්ඨු. අට්ඨිං කත්වාති අත්ථිකභාවං කත්වා, අත්ථිකො හුත්වාති වුත්තං හොති. ඤත්තිදුතියෙන කම්මෙනාති ‘‘සුණාතු මෙ, භන්තෙ, සඞ්ඝො’’තිආදිනා (පාචි. 446) පදභාජනියං වුත්තෙන මොහාරොපනකෙන ඤත්තිදුතියෙන කම්මෙන.

අධම්මකම්මෙති එත්ථ මොහාරොපනකම්මං අධිප්පෙතං.

මොහනසික්ඛාපදවණ්ණනා නිට්ඨිතා.