10. උය්‍යොධිකසික්ඛාපදවණ්ණනා
සම්පහාරට්ඨානස්සාති යුද්ධභූමියා. බලස්ස අග්ගං ජානන්තීති ‘‘එත්තකා හත්ථී, එත්තකා අස්සා, එත්තකා රථා, එත්තකා පත්තී’’ති (පාචි. 324) බලස්ස කොට්ඨාසං ජානන්ති. ‘‘අනුජානාමි, භික්ඛවෙ, විහාරග්ගෙනා’’තිආදීසු (චූළව. 318) විය කොට්ඨාසත්ථො හෙත්ථ අග්ගසද්දො. තෙනාහ ‘‘බලගණනට්ඨානන්ති අත්ථො’’ති. සෙනාය වියූහන්ති ‘‘ඉතො හත්ථී හොන්තු, ඉතො අස්සා හොන්තු, ඉතො රථා හොන්තු, ඉතො පත්තී හොන්තූ’’ති (පාචි. 324) සෙනාය ඨපනං, රාසිං කත්වා ඨපනන්ති අත්ථො. තෙනාහ ‘‘සෙනාසන්නිවෙසස්සෙතං නාම’’න්ති. ද්වාදසපුරිසො හත්ථීති චත්තාරො ආරොහකා, එකෙකපාදරක්ඛකා ද්වෙ ද්වෙති එවං ද්වාදසපුරිසො හත්ථී. තිපුරිසො අස්සොති එකො ආරොහකො, ද්වෙ පාදරක්ඛකාති එවං තිපුරිසො අස්සො. චතුපුරිසො රථොති එකො සාරථි, එකො යොධො, ද්වෙ ආණිරක්ඛකාති එවං චතුපුරිසො රථොති.
උය්‍යොධිකසික්ඛාපදවණ්ණනා නිට්ඨිතා.
අචෙලකවග්ගො පඤ්චමො.