2. භික්ඛුඅක්කොසනසික්ඛාපදවණ්ණනා
දුතියෙ අක්කොසෙය්‍යාති දසන්නං අක්කොසවත්ථූනං අඤ්ඤතරෙන සම්මුඛා වා පරම්මුඛා වා අක්කොසෙය්‍ය. පරිභාසෙය්‍යාති භයමස්ස උපදංසෙය්‍ය. පාචිත්තියන්ති තස්සා එවං කරොන්තියා පාචිත්තියං.
වෙසාලියං ඡබ්බග්ගියා භික්ඛුනියො ආරබ්භ ආයස්මන්තං උපාලිං අක්කොසනවත්ථුස්මිං පඤ්ඤත්තං, තිකපාචිත්තියං, අනුපසම්පන්නෙ තිකදුක්කටං, අත්ථධම්මඅනුසාසනිපුරෙක්ඛාරාය, උම්මත්තිකාදීනඤ්ච අනාපත්ති. උපසම්පන්නතා, අක්කොසනපරිභාසනං, අත්ථපුරෙක්ඛාරතාදීනං අභාවොති ඉමානෙත්ථ තීණි අඞ්ගානි. සමුට්ඨානාදීනි අදින්නාදානසදිසානි, ඉදං පන දුක්ඛවෙදනන්ති.
භික්ඛුඅක්කොසනසික්ඛාපදවණ්ණනා නිට්ඨිතා.