3. ගණපරිභාසනසික්ඛාපදවණ්ණනා
තතියෙ චණ්ඩිකතාති කුද්ධා. ගණන්ති භික්ඛුනිසඞ්ඝං. පරිභාසෙය්‍යාති එත්ථ ‘‘බාලා එතා අබ්‍යත්තා එතා, නෙතා ජානන්ති කම්මං වා කම්මදොසං වා කම්මසම්පත්තිං වා කම්මවිපත්තිං වා’’ති එවං යත්ථ කත්ථචි පරිභාසන්තියා පාචිත්තියං.
සාවත්ථියං ථුල්ලනන්දං ආරබ්භ ගණං පරිභාසනවත්ථුස්මිං පඤ්ඤත්තං, සම්බහුලා වා එකං වා අනුපසම්පන්නං වා පරිභාසන්තියා දුක්කටං. සෙසං දුතියසදිසමෙවාති.
ගණපරිභාසනසික්ඛාපදවණ්ණනා නිට්ඨිතා.