3. උප්පලදායිකාථෙරීඅපදානං

57. ‘‘නගරෙ අරුණවතියා, අරුණො නාම ඛත්තියො;

තස්ස රඤ්ඤො අහුං භරියා, එකජ්ඣං චාරයාමහං.

58. ‘‘රහොගතා නිසීදිත්වා, එවං චින්තෙසහං තදා;

‘කුසලං මෙ කතං නත්ථි, ආදාය ගමියං මම.

59. ‘‘‘මහාභිතාපං කටුකං, ඝොරරූපං සුදාරුණං;

නිරයං නූන ගච්ඡාමි, එත්ථ මෙ නත්ථි සංසයො’.

60. ‘‘එවාහං චින්තයිත්වාන, පහංසෙත්වාන මානසං;

රාජානං උපගන්ත්වාන, ඉදං වචනමබ්‍රවිං.

61. ‘‘‘ඉත්ථී නාම මයං දෙව, පුරිසානිත්තරා අහු [පුරිසානුගතා සදා (සී.), පුරිසා න භවාම නො (ස්‍යා.), පුරිසානං භරා මයං (පී.)];

එකං මෙ සමණං දෙහි, භොජයිස්සාමි ඛත්තිය’.

62. ‘‘අදාසි මෙ තදා රාජා, සමණං භාවිතින්ද්‍රියං;

තස්ස පත්තං ගහෙත්වාන, පරමන්නෙන පූරයිං.

63. ‘‘පූරෙත්වා පරමං අන්නං, සහ සුගන්ධලෙපනං;

මහාචෙලෙන ඡාදිත්වා, අදාසිං තුට්ඨමානසා.

64. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

65. ‘‘සහස්සදෙවරාජූනං, මහෙසිත්තමකාරයිං;

සහස්සචක්කවත්තීනං, මහෙසිත්තමකාරයිං.

66. ‘‘පදෙසරජ්ජං විපුලං, ගණනාතො අසඞ්ඛියං;

නානාවිධං බහුං අඤ්ඤං, තස්ස කම්මඵලං තතො.

67. ‘‘උප්පලස්සෙව මෙ වණ්ණො, අභිරූපා සුදස්සනා;

ඉත්ථිසබ්බඞ්ගසම්පන්නා, අභිජාතා ජුතින්ධරා.

68. ‘‘පච්ඡිමෙ භවෙ සම්පත්තෙ, අජායිං සාකියෙ කුලෙ;

නාරීසහස්සපාමොක්ඛා, සුද්ධොදනසුතස්සහං.

69. ‘‘නිබ්බින්දිත්වා අගාරෙහං, පබ්බජිං අනගාරියං;

සත්තමීරත්තිසම්පත්තා [සත්තමිංරත්තිමපත්තා (සී. ස්‍යා. පී.)], චතුසච්චමපාපුණිං.

70. ‘‘චීවරං පිණ්ඩපාතඤ්ච, පච්චයං සයනාසනං;

පරිමෙතුං න සක්කොමි, පිණ්ඩපාතස්සිදං ඵලං.

71. ‘‘යං මය්හං පූරිතං කම්මං, කුසලං සරසෙ මුනි;

තුය්හත්ථාය මහාවීර, පරිචත්තං බහුං මයා.

72. ‘‘එකත්තිංසෙ ඉතො කප්පෙ, යං දානමදදිං තදා;

දුග්ගතිං නාභිජානාමි, පිණ්ඩපාතස්සිදං ඵලං.

73. ‘‘ද්වෙ ගතියො පජානාමි, දෙවත්තං අථ මානුසං;

අඤ්ඤං ගතිං න ජානාමි, පිණ්ඩපාතස්සිදං ඵලං.

74. ‘‘උච්චෙ කුලෙ පජායාමි, මහාසාලෙ [තයො සාල (ක.)] මහද්ධනෙ;

අඤ්ඤෙ කුලෙ න ජායාමි, පිණ්ඩපාතස්සිදං ඵලං.

75. ‘‘භවාභවෙ සංසරිත්වා, සුක්කමූලෙන චොදිතා;

අමනාපං න පස්සාමි, සොමනස්සකතං ඵලං.

76. ‘‘ඉද්ධීසු ච වසී හොමි, දිබ්බාය සොතධාතුයා;

චෙතොපරියඤාණස්ස, වසී හොමි මහාමුනෙ.

77. ‘‘පුබ්බෙනිවාසං ජානාමි, දිබ්බචක්ඛු විසොධිතං;

සබ්බාසවපරික්ඛීණා, නත්ථි දානි පුනබ්භවො.

78. ‘‘අත්ථධම්මනිරුත්තීසු, පටිභානෙ තථෙව ච;

ඤාණං මම මහාවීර, උප්පන්නං තව සන්තිකෙ.

79. ‘‘කිලෙසා ඣාපිතා මය්හං…පෙ… විහරාමි අනාසවා.

80. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

81. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං උප්පලදායිකා භික්ඛුනී භගවතො සම්මුඛා ඉමා ගාථායො අභාසිත්ථාති.

උප්පලදායිකාථෙරියාපදානං තතියං.