4. සිඞ්ගාලමාතුථෙරීඅපදානං

82. ‘‘පදුමුත්තරො නාම ජිනො, සබ්බධම්මාන පාරගූ;

ඉතො සතසහස්සම්හි, කප්පෙ උප්පජ්ජි නායකො.

83. ‘‘තදාහං හංසවතියං, ජාතාමච්චකුලෙ අහුං;

නානාරතනපජ්ජොතෙ, ඉද්ධෙ ඵීතෙ මහද්ධනෙ.

84. ‘‘පිතුනා සහ ගන්ත්වාන, මහාජනපුරක්ඛතා;

ධම්මං බුද්ධස්ස සුත්වාන, පබ්බජිං අනගාරියං.

85. ‘‘පබ්බජිත්වාන කායෙන, පාපකම්මං විවජ්ජයිං;

වචීදුච්චරිතං හිත්වා, ආජීවං පරිසොධයිං.

86. ‘‘බුද්ධෙ පසන්නා ධම්මෙ ච, සඞ්ඝෙ ච තිබ්බගාරවා;

සද්ධම්මස්සවනෙ යුත්තා, බුද්ධදස්සනලාලසා [බුද්ධදස්සනසාලයා (ස්‍යා.)].

87. ‘‘අග්ගං සද්ධාධිමුත්තානං, අස්සොසිං භික්ඛුනිං තදා;

තං ඨානං පත්ථයිත්වාන, තිස්සො සික්ඛා අපූරයිං.

88. ‘‘තතො මං සුගතො ආහ, කරුණානුගතාසයො;

‘යස්ස සද්ධා තථාගතෙ, අචලා සුප්පතිට්ඨිතා;

සීලඤ්ච යස්ස කල්‍යාණං, අරියකන්තං පසංසිතං.

89. ‘‘‘සඞ්ඝෙ පසාදො යස්සත්ථි, උජුභූතඤ්ච දස්සනං;

අදලිද්දොති තං ආහු, අමොඝං තස්ස ජීවිතං.

90. ‘‘‘තස්මා සද්ධඤ්ච සීලඤ්ච, පසාදං ධම්මදස්සනං;

අනුයුඤ්ජෙථ මෙධාවී, සරං බුද්ධාන [බුද්ධානුසාසනං (සී.), බුද්ධානං සාසනං (ස්‍යා.)] සාසනං’.

91. ‘‘තං සුත්වාහං පමුදිතා, අපුච්ඡිං පණිධිං මම;

තදා අනොමො අමිතො, බ්‍යාකරිත්ථ විනායකො;

‘බුද්ධෙ පසන්නා කල්‍යාණී, ලච්ඡසෙ තං සුපත්ථිතං.

92. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

93. ‘‘‘තස්ස ධම්මෙසු දායාදා, ඔරසා ධම්මනිම්මිතා;

සිඞ්ගාලකස්ස [සිගාලකස්ස (සී. පී.)] මාතාති, හෙස්සති සත්ථු සාවිකා’.

94. ‘‘තං සුත්වා මුදිතා හුත්වා, යාවජීවං තදා ජිනං;

මෙත්තචිත්තා පරිචරිං, පටිපත්තීහි නායකං.

95. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

96. ‘‘පච්ඡිමෙ ච භවෙ දානි, ගිරිබ්බජපුරුත්තමෙ;

ජාතා සෙට්ඨිකුලෙ ඵීතෙ, මහාරතනසඤ්චයෙ.

97. ‘‘පුත්තො සිඞ්ගාලකො නාම, මමාසි විපථෙ රතො;

දිට්ඨිගහනපක්ඛන්දො, දිසාපූජනතප්පරො.

98. ‘‘නානාදිසා නමස්සන්තං [නමස්සති (ස්‍යා.)], පිණ්ඩාය නගරං වජං;

තං දිස්වා ඔවදී බුද්ධො, මග්ගෙ ඨත්වා විනායකො.

99. ‘‘තස්ස දෙසයතො ධම්මං, පනාදො විම්හයො අහු;

ද්වෙකොටිනරනාරීනං, ධම්මාභිසමයො අහු.

100. ‘‘තදාහං පරිසං ගන්ත්වා, සුත්වා සුගතභාසිතං;

සොතාපත්තිඵලං පත්තා, පබ්බජිං අනගාරියං.

101. ‘‘න චිරෙනෙව කාලෙන, බුද්ධදස්සනලාලසා;

අනුස්සතිං තං භාවෙත්වා, අරහත්තමපාපුණිං.

102. ‘‘දස්සනත්ථාය බුද්ධස්ස, සබ්බදා ච වජාමහං;

අතිත්තායෙව පස්සාමි, රූපං නයනනන්දනං.

103. ‘‘සබ්බපාරමිසම්භූතං, ලක්ඛීනිලයනං වරං;

රූපං සබ්බසුභාකිණ්ණං, අතිත්තා විහරාමහං.

104. ‘‘ජිනො තස්මිං ගුණෙ තුට්ඨො, එතදග්ගෙ ඨපෙසි මං;

සිඞ්ගාලකස්ස යා මාතා, අග්ගා සද්ධාධිමුත්තිකා [සංඝවිමුත්තිකා (පී.), මමාධිමුත්තිකා (ක.)].

105. ‘‘ඉද්ධීසු ච වසී හොමි, දිබ්බාය සොතධාතුයා;

චෙතොපරියඤාණස්ස, වසී හොමි මහාමුනි.

106. ‘‘පුබ්බෙනිවාසං ජානාමි, දිබ්බචක්ඛු විසොධිතං;

සබ්බාසවපරික්ඛීණා, නත්ථි දානි පුනබ්භවො.

107. ‘‘අත්ථධම්මනිරුත්තීසු, පටිභානෙ තථෙව ච;

ඤාණං මම මහාවීර, උප්පන්නං තව සන්තිකෙ.

108. ‘‘කිලෙසා ඣාපිතා මය්හං…පෙ… විහරාමි අනාසවා.

109. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

110. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං සිඞ්ගාලමාතා භික්ඛුනී ඉමා ගාථායො අභාසිත්ථාති.

සිඞ්ගාලමාතුථෙරියාපදානං චතුත්ථං.