නමො තස්ස භගවතො අරහතො සම්මාසම්බුද්ධස්ස

ඛුද්දකනිකායෙ

ථෙරීඅපදානපාළි

1. සුමෙධාවග්ගො

1. සුමෙධාථෙරීඅපදානං

අථ ථෙරිකාපදානානි සුණාථ –

1. ‘‘භගවති කොණාගමනෙ, සඞ්ඝාරාමම්හි නවනිවෙසනම්හි [නිවෙසම්හි (ස්‍යා.)];

සඛියො තිස්සො ජනියො, විහාරදානං අදාසිම්හ.

2. ‘‘දසක්ඛත්තුං සතක්ඛත්තුං, දසසතක්ඛත්තුං සතානඤ්ච සතක්ඛත්තුං [සතානි ච සත්තක්ඛත්තුං (සී. ක.)];

දෙවෙසු උපපජ්ජිම්හ, කො වාදො මානුසෙ භවෙ.

3. ‘‘දෙවෙ මහිද්ධිකා අහුම්හ, මානුසකම්හි කො වාදො;

සත්තරතනමහෙසී [සත්තරතනස්ස මහෙසී (සී. පී.)], ඉත්ථිරතනං අහං භවිං.

4. ‘‘ඉධ සඤ්චිතකුසලා [තත්ථ සඤ්චිතං කුසලං (ස්‍යා.)], සුසමිද්ධකුලප්පජා;

ධනඤ්ජානී ච ඛෙමා ච, අහම්පි ච තයො ජනා.

5. ‘‘ආරාමං සුකතං කත්වා, සබ්බාවයවමණ්ඩිතං;

බුද්ධප්පමුඛසඞ්ඝස්ස, නිය්‍යාදෙත්වා සමොදිතා.

6. ‘‘යත්ථ යත්ථූපපජ්ජාමි, තස්ස කම්මස්ස වාහසා;

දෙවෙසු අග්ගතං පත්තා, මනුස්සෙසු තථෙව ච.

7. ‘‘ඉමස්මිංයෙව කප්පම්හි, බ්‍රහ්මබන්ධු මහායසො;

කස්සපො නාම ගොත්තෙන, උප්පජ්ජි වදතං වරො.

8. ‘‘උපට්ඨාකො මහෙසිස්ස, තදා ආසි නරිස්සරො;

කාසිරාජා කිකී නාම, බාරාණසිපුරුත්තමෙ.

9. ‘‘තස්සාසුං සත්ත ධීතරො, රාජකඤ්ඤා සුඛෙධිතා [සුඛෙථිතා (ස්‍යා.)];

බුද්ධොපට්ඨානනිරතා, බ්‍රහ්මචරියං චරිංසු තා.

10. ‘‘තාසං සහායිකා හුත්වා, සීලෙසු සුසමාහිතා;

දත්වා දානානි සක්කච්චං, අගාරෙව වතං [අගාරෙව වත්තං (ස්‍යා.)] චරිං.

11. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසූපගා අහං.

12. ‘‘තතො චුතා යාමමගං [යාමසග්ගං (ස්‍යා.)], තතොහං තුසිතං ගතා;

තතො ච නිම්මානරතිං, වසවත්තිපුරං තතො.

13. ‘‘යත්ථ යත්ථූපපජ්ජාමි, පුඤ්ඤකම්මසමොහිතා;

තත්ථ තත්ථෙව රාජූනං, මහෙසිත්තමකාරයිං.

14. ‘‘තතො චුතා මනුස්සත්තෙ, රාජූනං චක්කවත්තිනං;

මණ්ඩලීනඤ්ච රාජූනං, මහෙසිත්තමකාරයිං.

15. ‘‘සම්පත්තිමනුභොත්වාන, දෙවෙසු මානුසෙසු ච;

සබ්බත්ථ සුඛිතා හුත්වා, නෙකජාතීසු සංසරිං.

16. ‘‘සො හෙතු ච සො පභවො, තම්මූලං සාසනෙ ඛමං [තම්මූලං සා ච සාසනෙ ඛන්ති (සී. පී. ක.)];

පඨමං තං සමොධානං, තං ධම්මරතාය නිබ්බානං [නිබ්බුතං (ස්‍යා.)].

17. ‘‘කිලෙසා ඣාපිතා මය්හං, භවා සබ්බෙ සමූහතා;

නාගීව බන්ධනං ඡෙත්වා, විහරාමි අනාසවා.

18. ‘‘ස්වාගතං වත මෙ ආසි, මම බුද්ධස්ස [බුද්ධසෙට්ඨස්ස (සී. ස්‍යා. ක.)] සන්තිකෙ;

තිස්සො විජ්ජා අනුප්පත්තා, කතං බුද්ධස්ස සාසනං.

19. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං සුමෙධා භික්ඛුනී ඉමා ගාථායො අභාසිත්ථාති.

සුමෙධාථෙරියාපදානං පඨමං.

2. මෙඛලාදායිකාථෙරීඅපදානං

20. ‘‘සිද්ධත්ථස්ස භගවතො, ථූපකාරාපිකා අහුං [ථූපකාර මකාසහං (ස්‍යා.)];

මෙඛලිකා මයා දින්නා, නවකම්මාය සත්ථුනො.

21. ‘‘නිට්ඨිතෙ ච මහාථූපෙ, මෙඛලං පුනදාසහං;

ලොකනාථස්ස මුනිනො, පසන්නා සෙහි පාණිභි.

22. ‘‘චතුන්නවුතිතො කප්පෙ, යං මෙඛලමදං තදා;

දුග්ගතිං නාභිජානාමි, ථූපකාරස්සිදං ඵලං.

23. ‘‘කිලෙසා ඣාපිතා මය්හං…පෙ… විහරාමි අනාසවා.

24. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

25. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං මෙඛලාදායිකා භික්ඛුනී ඉමා ගාථායො අභාසිත්ථාති.

මෙඛලාදායිකාථෙරියාපදානං දුතියං.

3. මණ්ඩපදායිකාථෙරීඅපදානං

26. ‘‘කොණාගමනබුද්ධස්ස, මණ්ඩපො කාරිතො මයා;

ධුවං තිචීවරංදාසිං [ථූපඤ්ච පවරමදං (ස්‍යා.), ධුවඤ්ච චීවරං අදං (පී.)], බුද්ධස්ස ලොකබන්ධුනො.

27. ‘‘යං යං ජනපදං යාමි, නිගමෙ රාජධානියො;

සබ්බත්ථ පූජිතො හොමි, පුඤ්ඤකම්මස්සිදං ඵලං.

28. ‘‘කිලෙසා ඣාපිතා මය්හං…පෙ… විහරාමි අනාසවා.

29. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

30. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං මණ්ඩපදායිකා භික්ඛුනී ඉමා ගාථායො අභාසිත්ථාති.

මණ්ඩපදායිකාථෙරියාපදානං තතියං.

4. සඞ්කමනත්ථාථෙරීඅපදානං

31. ‘‘විපස්සිස්ස භගවතො [කොණ්ඩඤ්ඤස්ස භගවතො (ස්‍යා. පී.)], ලොකජෙට්ඨස්ස තාදිනො;

රථියං පටිපන්නස්ස, තාරයන්තස්ස පාණිනො.

32. ‘‘ඝරතො නික්ඛමිත්වාන, අවකුජ්ජා නිපජ්ජහං;

අනුකම්පකො ලොකනාථො, සිරසි [සීසන්තෙ (සී. ක.)] අක්කමී මම [තදා (ස්‍යා. පී.)].

33. ‘‘අක්කමිත්වාන සිරසි [සම්බුද්ධො (ක.)], අගමා ලොකනායකො;

තෙන චිත්තප්පසාදෙන, තුසිතං අගමාසහං.

34. ‘‘කිලෙසා ඣාපිතා මය්හං…පෙ… විහරාමි අනාසවා.

35. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

36. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං සඞ්කමනත්ථා [සඞ්කමනදා (ස්‍යා.)] භික්ඛුනී ඉමා ගාථායො අභාසිත්ථාති.

සඞ්කමනත්ථාථෙරියාපදානං චතුත්ථං.

5. නළමාලිකාථෙරීඅපදානං

37. ‘‘චන්දභාගානදීතීරෙ, අහොසිං කින්නරී තදා;

අද්දසං විරජං බුද්ධං, සයම්භුං අපරාජිතං.

38. ‘‘පසන්නචිත්තා සුමනා, වෙදජාතා කතඤ්ජලී;

නළමාලං ගහෙත්වාන, සයම්භුං අභිපූජයිං.

39. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා කින්නරීදෙහං, අගච්ඡිං තිදසං ගතිං.

40. ‘‘ඡත්තිංසදෙවරාජූනං, මහෙසිත්තමකාරයිං;

දසන්නං චක්කවත්තීනං, මහෙසිත්තමකාරයිං;

සංවෙජෙත්වාන මෙ චිත්තං [වෙදයිත්වාන කුසලං (ස්‍යා.), සංවෙදයිත්වා කුසලං (පී.)], පබ්බජිං අනගාරියං.

41. ‘‘කිලෙසා ඣාපිතා මය්හං, භවා සබ්බෙ සමූහතා [භවා සංඝාතිතා මම (ක.)];

සබ්බාසවපරික්ඛීණා, නත්ථි දානි පුනබ්භවො.

42. ‘‘චතුන්නවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, පුප්ඵපූජායිදං ඵලං.

43. ‘‘කිලෙසා ඣාපිතා මය්හං…පෙ… විහරාමි අනාසවා.

44. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

45. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං නළමාලිකා ථෙරී ඉමා ගාථායො අභාසිත්ථාති.

නළමාලිකාථෙරියාපදානං පඤ්චමං.

6. එකපිණ්ඩපාතදායිකාථෙරීඅපදානං

46. ‘‘නගරෙ බන්ධුමතියා, බන්ධුමා නාම ඛත්තියො;

තස්ස රඤ්ඤො අහුං භරියා, එකජ්ඣං චාරයාමහං [එකච්චං වාදයාමහං (ස්‍යා.)].

47. ‘‘රහොගතා නිසීදිත්වා, එවං චින්තෙසහං තදා;

‘ආදාය ගමනීයඤ්හි, කුසලං නත්ථි මෙ කතං.

48. ‘‘‘මහාභිතාපං කටුකං, ඝොරරූපං සුදාරුණං;

නිරයං නූන ගච්ඡාමි, එත්ථ මෙ නත්ථි සංසයො’.

49. ‘‘රාජානං උපසඞ්කම්ම, ඉදං වචනමබ්‍රවිං;

‘එකං මෙ සමණං දෙහි, භොජයිස්සාමි ඛත්තිය’.

50. ‘‘අදාසි මෙ මහාරාජා, සමණං භාවිතින්ද්‍රියං;

තස්ස පත්තං ගහෙත්වාන, පරමන්නෙන පූරයිං [තප්පයිං (සී.)].

51. ‘‘පූරයිත්වා පරමන්නං, ගන්ධාලෙපං අකාසහං;

ජාලෙන පිදහිත්වාන, වත්ථයුගෙන [පීතචොළෙන (ස්‍යා.), මහානෙලෙන (පී.)] ඡාදයිං.

52. ‘‘ආරම්මණං මමං එතං, සරාමි යාවජීවිහං;

තත්ථ චිත්තං පසාදෙත්වා, තාවතිංසමගච්ඡහං.

53. ‘‘තිංසානං දෙවරාජූනං, මහෙසිත්තමකාරයිං;

මනසා පත්ථිතං මය්හං, නිබ්බත්තති යථිච්ඡිතං [යතිච්ඡකං (ස්‍යා.), යදිච්ඡකං (පී. ක.)].

54. ‘‘වීසානං චක්කවත්තීනං, මහෙසිත්තමකාරයිං;

ඔචිතත්තාව [උපචිතත්තා (ස්‍යා.)] හුත්වාන, සංසරාමි භවෙස්වහං.

55. ‘‘සබ්බබන්ධනමුත්තාහං, අපෙතා මෙ උපාදිකා;

සබ්බාසවපරික්ඛීණා, නත්ථි දානි පුනබ්භවො.

56. ‘‘එකනවුතිතො කප්පෙ, යං දානමදදිං තදා;

දුග්ගතිං නාභිජානාමි, පිණ්ඩපාතස්සිදං ඵලං.

57. ‘‘කිලෙසා ඣාපිතා මය්හං…පෙ… විහරාමි අනාසවා.

58. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

59. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං එකපිණ්ඩපාතදායිකා භික්ඛුනී ඉමා ගාථායො අභාසිත්ථාති.

එකපිණ්ඩපාතදායිකාථෙරියාපදානං ඡට්ඨං.

7. කටච්ඡුභික්ඛාදායිකාථෙරීඅපදානං

60. ‘‘පිණ්ඩචාරං චරන්තස්ස, තිස්සනාමස්ස සත්ථුනො;

කටච්ඡුභික්ඛං පග්ගය්හ, බුද්ධසෙට්ඨස්ස දාසහං.

61. ‘‘පටිග්ගහෙත්වා සම්බුද්ධො, තිස්සො ලොකග්ගනායකො;

වීථියා සණ්ඨිතො සත්ථා, අකා මෙ අනුමොදනං.

62. ‘‘‘කටච්ඡුභික්ඛං දත්වාන, තාවතිංසං ගමිස්සසි;

ඡත්තිංසදෙවරාජූනං, මහෙසිත්තං කරිස්සසි.

63. ‘‘‘පඤ්ඤාසං චක්කවත්තීනං, මහෙසිත්තං කරිස්සසි;

මනසා පත්ථිතං සබ්බං, පටිලච්ඡසි සබ්බදා.

64. ‘‘‘සම්පත්තිං අනුභොත්වාන, පබ්බජිස්සසිකිඤ්චනා;

සබ්බාසවෙ පරිඤ්ඤාය, නිබ්බායිස්සසිනාසවා’.

65. ‘‘ඉදං වත්වාන සම්බුද්ධො, තිස්සො ලොකග්ගනායකො;

නභං අබ්භුග්ගමී වීරො, හංසරාජාව අම්බරෙ.

66. ‘‘සුදින්නං මෙ දානවරං [සුදින්නමෙව මෙ දානං (ස්‍යා.)], සුයිට්ඨා යාගසම්පදා;

කටච්ඡුභික්ඛං දත්වාන, පත්තාහං අචලං පදං.

67. ‘‘ද්වෙනවුතෙ ඉතො කප්පෙ, යං දානමදදිං තදා;

දුග්ගතිං නාභිජානාමි, භික්ඛාදානස්සිදං ඵලං.

68. ‘‘කිලෙසා ඣාපිතා මය්හං…පෙ… විහරාමි අනාසවා.

69. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

70. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං කටච්ඡුභික්ඛාදායිකා භික්ඛුනී ඉමා ගාථායො අභාසිත්ථාති.

කටච්ඡුභික්ඛාදායිකාථෙරියාපදානං සත්තමං.

8. සත්තුප්පලමාලිකාථෙරීඅපදානං