10. කප්පටකුරත්ථෙරගාථා

199. ‘‘අයමිති කප්පටො කප්පටකුරො, අච්ඡාය අතිභරිතාය [අතිභරියාය (සී. ක.), අච්චං භරාය (ස්‍යා.)];

අමතඝටිකායං ධම්මකටමත්තො [ධම්මකටපත්තො (ස්‍යා. ක. අට්ඨ.), ධම්මකටමග්ගො (සී. අට්ඨ.)], කතපදං ඣානානි ඔචෙතුං.

200. ‘‘මා ඛො ත්වං කප්පට පචාලෙසි, මා ත්වං උපකණ්ණම්හි තාළෙස්සං;

න හි [න වා (ක.)] ත්වං කප්පට මත්තමඤ්ඤාසි, සඞ්ඝමජ්ඣම්හි පචලායමානොති.

… කප්පටකුරො ථෙරො….

වග්ගො චතුත්ථො නිට්ඨිතො.

තස්සුද්දානං –

මිගසිරො සිවකො ච, උපවානො ච පණ්ඩිතො;

ඉසිදින්නො ච කච්චානො, නිතකො ච මහාවසී;

පොටිරියපුත්තො නිසභො, උසභො කප්පටකුරොති.